Governu Gusmao Lá Konsege Ezekuta OJE 2012 to'o 100 Porcentu

Jornal INDEPENDENTE
Kuarta, 13 Juñu 2012

"Governu Foin Gasta OJE U$431 Millaun"

Organizasaun naun Govermental Luta Hamutuk la fiar Governu sei ezekuta Orsamentu Jeral Estadu (OJE) to’o porsentu 100, tanba tuir relatoriu primeiru Trimester governu nian, foin gasta millioens U$431,000,000.00 resin Dolar Amerikanu.

OJE 2012, hamutuk Billiaun U$1,674, 129,352.00, mandatu Governu Aliansa Maioria Parlamentar (AMP) sei remata iha loron 7 fulan Agostu, tinan ida ne’e.

Vise Diretur Luta Hamutuk, Joaozito Viana, hateten, orsamentu ne’ebe maka oras ne’e dadaun iha prosesu komitmentu (asina kontratu atu ezekuta) maka millioens 72,930,641.47 no obrigasoins hamutuk millioens U$352,724,180.37. Ho ida ne’e,  ezekusaun Orsamentu Jeral Estadu 2012 foin atinji porsentu 26.

Ho volume orsamentu ne’ebe gasta ona, Luta Hamutuk (LH) konsidera Governu husu osan bo'ot maibe lá iha kapasidade atu ezekuta.

"Iha tempu kampaña sira komesa tanis ho komunidade sira katak povu susar duni, maibe sira lá hatene katak orsamentu tinan ida ne’e U$1,674,129,252.000 bele rejolve povu nia problema," dehan Vise Diretor Luta Hamutuk, Viana, bá Jornalista sira, Tersa (12/6), iha nia servisu fatin, Mandarin, Dili.

Nia (Joaozito-red) mos hateten," Ami lá fiar sira sei ezekuta diak to’o porcentu 100, sei ezekuta deit to’o porsentu 100 ne’e fakar saugate deit, Ministru sira maka sei goza, kontrator sira maka sei goza,"nia dehan.

Nune’e mos, Peskizador La’o Hamutuk, Charles dehan, orsamentu ne’ebe maka governu lá konsege ezekuta tenki fila bá kofre do estadu. Atu avita osan ne’e labele gasta saugate, peskizador ne’e dehan, Governu labele kria planu emerjensia ruma hodi ezekuta lalais osan ne’e, tanba sei lá iha nia sustentavel.

Membru Governu Halo Kobransa Ilegal Bé-Mo'os Bá Komunidade Comoro

Notisia Husi TVTL
Domingu Kalan, 17 Junu 2012

Povu Halerik Bá Bé-Mo'os
"Membru Governu Halo Kobransa Ilegal, Komunidade Sai Vitima"

Uma kain hamutuk Hitu-Nulu (70) resin iha bairu Moris Foun, Suku Comoro, tinan 2 resin lá hetan asesu bá bé-mo'os. Komunidade Moris Foun husu bá governu atu rejolve situasaun ne'e.

Problema bé-mo'os kontinua sai problema bá komunidade iha kapital Dili. Ne'e maka realidade populasaun Comoro, Agustinho Pereira, komunidade lokal hateten, problema ne'e sira infrenta kleur ona maibe to'o oras ne'e seidauk iha solusaun. Nia (Agustinho-red) mos hatutan agora dadaun ne'e sira aproveita deit bé-mota hodi responde sira nian necesidade lor-loron nian no dala ruma sira mos tenki sosa bé-mo'os ho presu U$25.00

"Durante ne'e komunidade sira kuru bé'e iha mota, dala ruma kompañia sira mai fa'an maka ami sosa," dehan Agustinho.

Nune'e mos ekipa SAS mai promete no kada uma kain tenki selu U$55.00 komunidade lokal sira halo tuir no selu tiha maibe to'o oras neé lá iha rezultadu.

"Ami uma kain ida selu U$55.00, ami selu tiha hotu iha ne'e, bé'e maran ami bá fo hatene SAS dehan ami selu ne'e ilegal fali ona, nune'e mos ami dehan bá sira, sira bá haruka ami selu ne'e tamba sira uza kareta estadu (Kareta SAS)," dehan nia ho tristeza.

Governu AMP Lá Selu Estudantes Medicina Baucau Durante Fulan 6

Notisia Husi TVTL
Sesta Kalan, 15 Junu 2012

Ministeriu Saude Lá Tau Atensaun

"Estudante Medicina Halerik Tamba Fulan 6 Lá Simu Subsidiu Husi Governu"

Estudante Medicina ne’ebe koloka iha Distritu Baucau lamenta ho sira nian subsidiu fulan Ne'en (6), ne’ebe seidauk simu. Estudantes sira husu bá Ministeriu kompotente atu rejolve lai-lais kazu ne’e.

Estudante Medicina ne’ebe kolokante iha Hospital referensia Distritu Baucau, lamenta no preokupa ho subsidiu ne’ebe sira simu husi governu tamba fulan 6 ona maka estudante sira lá simu sira nian subsidiu.

Estudante hirak ne’e hateten katak, konsekuensia husi atrazu simu subsidiu ne’e difikulta sira atu hola sira nian necesidade primarias, inklui aluga uma no foto kopia material ne’ebe sira simu iha sala laran.

"Fulan 6 ona ami lá simu osan, ami senti preokupa lo'os tamba ami iha ne’e balun aluga uma, be'e-hemu mos sosa hotu entaun fulan 6 ami lá simu osan, ami preokupa los," dehan estudante ne’e.
 
Iha fatin hanesan, Estudante Migel Vitor, husi Distritu Manatuto mos lamenta ho falta mobiliaria eskolar ne’ebe lá favorese sira nian aprendizaen.

Governu AMP Abandona Futuru Estudantes EP Acalay Tu'ur Iha Rai

Jornal INDEPENDENTE
Kuarta, 06 Juñu 2012 

“Tinan 5, Estudante EP Aculau Tu’ur Iha Rai” 

Tristeza bo’ot bainhira Professor nain rua (2) deit bele hanorin alunus hamutuk 300 kada loron.

Diretor Eskola Primaria Norema, Agustinho Soares, hateten, durante tinan  lima (5) ona sira nia eskola iha deit maka hanorin alunus hamutuk nain 300. Eskola Primaria ne’e eziste iha Suku Aculau Sare, Sub-Distritu Hatulia, Distritu Ermera.

Volontariu iha eskola ne’e hamutuk nain 4, maibe sira lá aguenta no  sai husi eskola tanba tinan 5 ona lá simu salariu no Ministeriu Edukasaun lá konsidera hodi foti sira hanesan funsionariu.

“Ami hakarak labarik sira ne’e sai matenek, maske hela iha area  rurais, maibe susar tamba iha deit professor nain rua deit, labele atende alunus 300,” hateten Agustinho bá INDEPENDENTE foin lalais ne’e, iha Asulau Sare, Distritu Ermera.

Eskola ne’e mos hasoru difikuldade fasilidades lá iha hanesan uma a’at,  kadeiras no meza lá iha.

Tanba ME lá atende difikuldade ne’e, estudante sira tuir prosesu aprendizazen ho tu’ur iha rai.

Ne’e duni, nia parte husu bá Governu, liu-liu bá Ministeriu Edukasaun  atu tau atensaun seriu bá problema, hodi bele rejolve lalais kondisaun eskola ne’e

Konstrusaun Sentru Elektrika Betanu Falhansu Governu Ho Kompañia

Jornal INDEPENDENTE
Kuarta, 06 Juñu 2012

“Governu - Kompañia Falha Iha Sentru Eletrika”

Organizasaun Naun Govermental (ONG), Lao Hamutuk (LH), identifika katak, prosesu konstrusaun Sentru Eletrika iha Betanu la’o tarde, laos failhansu husi Governu deit, maibe husi parte rua ne’e hotu.

Diretor LH, Mericio Akara, hatutan, Governu mos hila parte iha failhansu ne’e, tanba supervizaun lá du’un forte no lá akompaña hodi aselera lalais servisu bá konstrusaun, tanba Governu maka nain bá projetu, lolos Governu tenki forte bainhira implementador sira lá tuir prosesu kontratu halo intervensaun bele obriga.

“Governu fraku bainhira halo supervizaun no ladun brani atu hola  medida ruma hasoru kompañia sira,” tenik Akara, iha nia servisu fatin, Dili horsehik.

Nia dehan, projetu ne’e Governu tau fiar bá kompania sira hodi kaer  no lá liu husi prosesu tenderizasaun. Kompañia nia pozisaun atu hanesan ho Governu nia pozisaun, maka a’as tan nudar nain bá projetu, maibe, iha situasaun ne’e diferenti oituan, tanba kompañia senti nia a’an maka importante, tanba Governu maka presiza nia.

Falhansu ida husi kompañia maka, laos kompañia ida deit maka kaer  projetu, maibe iha kompañia hat (4) maka kaer lisuk servisu ne’e, hanesan, Puria Karya (Indonezia), Warisilia (Italia), CNI22 (Xina) no kompañia lokal sira ne’ebe kaer husi veteranu, ne’e duni entre sira ne’e dada malu hela hodi halo atraza servisu ne’e.