Tuesday, May 8, 2012

SES Francisco Guterres Fo Sala Komando Jeral PNTL

Image: areyouhappyatwork.wordpress.com
Jornal Timor Post
Sesta, 04 Maiu 2012

Ró Polisia Maritima A’at
“SES Francisco Fo Sala Bá Komando Jeral”

Sekretariu Estadu Seguransa (SES), Francisco Guterres, fo sala bá Komando Jeral, Polisia Nasional Timor-Leste (PNTL), tamba sira mak hato’o proposta hodi hola ró bá Polisia Unidade Maritima (PUM) ne’ebe laiha kualidade.


Francisco duvida, wainhira rona ró hamutuk sia (9), ne’ebe Polisia Unidade Maritima durante ne’e uza, a’at tiha ona.


“Tanba saida mak tenki hola sira hanesan ne’e, se ró sira ne’e lá diak, tanba saida mak tenke hola?,” hateten Francisco ba jornalista foin lalais ne’e iha palasiu do Governu.


Francisco dehan, nia lá kompreende, tanba sá mak iha momentu nia parte simu proposta husi Komando Jeral, husu atu hola ró ho modelu ne’ebe iha, no to’o ikus hetan a’at lalais de’it.


Ho problema ne’e, Francisco informa, nia parte loke ona prosesu investigasaun atu nune’e buka tuir motivu ró hirak ne’e nia a’at, no hikus mai bele hola fali ró ne’ebe iha kualidade diak.


Nia mos hateten, ró ba Unidade Polisia Maritima hamutuk 13, maibe oras ne’e dadauk hela deit 4 mak funsiona, no restu seluk a’at hotu ona.


Ba kestaun ne’e, antes ne’e mos, Komandante Polisia Unidade Maritima, Superientendente, Lino Saldanha, kestiaona maka’as kona bá prosesu manutensaunba ró ne’ebe iha, no ikus mai sai duni realidade no ró a'at arbiru. 

Projeitu Eletrisidade Fakar Osan Liu Montante Orsamentu Geral. FRETILIN Eziji CAC Investiga


Jornal INDEPENDENTE
Sesta, 04 Maiu 2012


“FRETILIN Eziji CAC Investiga Projeitu Eletrisidade”

Bankada FRETILIN iha Parlamentu Nasional (PN), eziji maka’as ba Comisaun Anti Corupsaun (CAC) hodi halo investigasaun bá projeitu eletrisidade.


Iha konferensia imprensa kinta-feira (03/05), Bankada FRETILIN kestiaona projeitu eletrisidade ne’ebe uza orsamentu liu montante orsamentu jeral estadu inklui fahe projeitu ba kompañia sira ne’ebe lá tuir regra normal.


Deputadu FRETILIN Joaquim Amaral, hatete, projeitu eletrisidade ne’ebe lao durante ne’e kauza ho emerjensia hotu, hahu husi fahe projeitu ba kompañia sira.


“FRETILIN observa iha EDTL ne’e hanesan pasar malam (merkadu kalan), ema ba dudu malu hodi simu projeitu, governu tenki deklara valor osan ne’e, inklui nia lokasi, presija hatene nia legalidade,” deklara Joaquim.


Tanba nia dehan, montante ne’ebe aloka bá eletrisidade liu ona fundu infra-estrutura bá tinan ida ne’e.


Nia dehan, Governu tenki klarifika orsamentu liu US$500 Milloens ne’ebe liu montante orsamentu planeadu iha tinan ida US$400 Milloens.


At liu Joaquim dehan, projeitu sira ne’e governu lá tau iha portal transparansia ne’ebe governu estabelese, tanba ne’e husu CAC atu investiga.


Entertantu Xefe bankada PD, deputado Adriano do Nascimento hatete instalasaun eletrisidade ne’ebe hala’o iha distritu Suai ladun iha kualidade, tanba lá tuir regra tekniku.


Alende ne’e, nia mos kestiaona, liu-liu voltazen ne’ebe bain-bain dada bá uma komunidade sira lá tuir standar.


“Baibain 220 volt, maibe realidade 175 volt, ne’ebe estraga hotu sasan eletronika,” lamenta Adriano. 

FTM Promete Lori Komandante Pedro Belo Bá Tribunal

Image: noticias.sapo.tl

Jornal Timor Post
Sesta, 04 Maiu 2012



“FTM Lori Pedro Belo Bá Tribunal”

Front Trabalhadores Maubere (FTM) promete sei lori Komandante Polisia Distritu Dili, Pedro Belo, bá Tribunal depois de halo investigasaun bá sira.


“Depois hearing (Sidang) ami nia maluk 84 no rona rejultadu foin ami lori Pedro Belo bá Tribunal, tamba tuir ami nia haree provokasaun ne’e mai uluk husi Komandante, Pedro Belo, ho ninia elementu sira, la’os husi FTM,” informa koordenador FTM, Carolino Marques, tenik bá jornalista sira iha konferensia imprensa ne’ebe halao iha kampus Fakuldade Siensia Sosial UNTL, Caicoli, Dili, Kinta (03/05).


Nia dehan, intensaun sira iha momentu ne’eba bá Hotel Timor, la’os halo demonstrasaun, maibe halo asaun solidaridade ba trabaladores nain 4 ne’ebe direjente Hotel Timor dún naok osan,\ iha gaveta laran, foin lalais ne’e.


Responde bá preokupasaun FTM ne’e, Komandante Polisia Distritu Dili, Pedro Belo, hateten, FTM kontra lei tamba sira nia asaun ne’e illegal, no sira FTM duni maka hahu konfrontasaun.


“Tan ne’e hau pronto bá hatan iha Tribunal wainhira FTM levanta, no hau iha testamunha barak ne’ebe mai husi rai laran no liur, momentu akontese konfrontasaun iha Hotel Timor,” Pedro dehan bá TP via telephone, kinta (03/05).


Entertantu, tuir fonte kredivel iha Hotel Timor bá Timor Post, iha Kinta horsehik, haktuir, Dirijente Hotel Timor (HT) halai ona bá Portugal, tamba tauk ho asaun ne’ebe foin lalais hala’o husi FTM ho Trabalhadores nain ha’at ne’e.


“Ami nia Dirijente Hotel Timor laiha ona, dezde horibainrua depois asaun demonstrasaun FTM, nia halai bá Portugal,” fonte ne’ebe lakohi fo nia identidade ne’e informa. 

Monday, May 7, 2012

CNE Simu Partidus 6 Halo Koligasaun Husi Partidus 26

Jornal Timor Post
Sesta, 04 Maiu 2012



“Koligasaun Eleitoral no Parlamentar Diferente”

Komisariu Comisaun Nacional Eleisoens (CNE), Jose Agustinho da Costa Belo, hateten, koligasaun eleitoral ne’ebe halo iha tempu eleisaun lá hanesan ho koligasaun hafoin eleisaun, tamba koligasaun iha tempu eleisaun atu hatene total kadeira hira mak sei hetan iha Parlamentu, no koligasaun hafoin eleisaun, ne’e koligasaun ne’ebe atu forma governu.


“Koligasaun eleitoral ne’e mak ita halo dadaun ne’e no koligasaun ida seluk mak kona bá forma governu,” Jose dehan ba TP, iha salaun apuramentu nasional, Comera, Dili, kinta (03/05).


Nia haktuir, koligasaun eleitoral ne’e bá de’it eleisaun, katak, partidu rua halo koligasaun atu bele hetan kadeira ruma iha Parlamentu tuir partidu ida-idak nia politika rasik, maibe, tama iha Parlamentu ne’e ida-idak ninia no CNE lá manda iha ne’eba, CNE so simu deit legal ne’ebe mak iha.


Enkuantu hafoin de eleisaun, kuandu partidu ida lá manan iha votus maioria absoluta maka tenke buka koligasaun bá partidu ne’ebe lakon hodi forma governu.


Iha parte seluk, Komisariu CNE, Arif Abdullah Sagran, hateten, husi partidus politikus 26 ne’ebe legal iha Tribunal Rekursu, iha partidu 6 mak hatama ona sira nia dokumentus koligasaun mai iha CNE hodi hasoru eleisaun Parlamentar ne’ebe sei monu iha 7 Julhu tinan ne’e.


Nia mos haklaken, husu bá partidu politiku sira atu hatama ona sira nia lista kandidatura ba CNE, tamba nia prazu to’o deit 11 Maiu 2012 tuku 17:00 OTL.