Monday, May 7, 2012

Deputadu Mateus de Jesus Kestiona Moral 30 Mil Elitores Dili Nian

Jornal Timor Post
Sesta, 04 Maiu 2012


“FRETILIN-CNRT Iha Interese Politika”

Deputadu Independente, Mateus de Jesus, hateten, razaun bankada CNRT abandona no FRETILIN presta nakonu iha diskusaun bá alterasaun projeitu lei numeru 6/2006, lei eleitoral, ne’e iha indikasaun interese politika.


“Hau hare’e konsensia moral bá ema hotu-hotu mak ladun iha, tamba hau har’ee fila fali bá iha Dili laran, iha segunda ronda eleisaun Prezidensial ne’e kuaze eleitor 30 ital mil mak lá bá vota, ne’e mak hau hakarak husu, iha Dili ne’e iha mota ka, bé bo’ot mak fo impaktu ka, ou kareta mak laiha?,” Mateus dehan bá Timor Post iha PN, (3/05), wainhira husu kona bá oinsa nia hare bá prezensa CNRT no FRETILIN nian iha diskusaun lei eleitoral.


Tuir nia, FRETILIN nia hanoin atu altera lei ne’e kapa’as para ema hotu-hotu labele lakon nia direitu, maske nia iha fatin ne’ebe deit, naran katak nia iha dokumentu komprobativu ida bele ezerse nia votu.


Nu’udar politiku, nia observa katak, sira nain rua (FRETILIN-CNRT) iha kepentingan pribadi dalam politik.


Enkuantu, Xefe bankada Partidu UNDERTIM (Unidade Nasional Demokratiku da Rezistensia Timorense) “L7” husu ba governu atu fasilita eleitores sira iha eleisaun parlamentar 7 de Julhu, no mos fo apoiu masimu bá STAE no CNE hodi aslera prosesu rejistu, tamba Parlamentu lá altera ona lei bá vota livre. 

Komunidade Kapital Dili Kontinua Preokupa Problema Bé-Mo’os


Notisia Husi TVTL
Kinta Kalan, 03 Maiu 2012



Mandatu Governu AMP Besik Remata 
“Povu Kontinua Ezizi Ba Governu Hodi Rejolve Problema Bé-Mo’os”

Komunidade iha kapital Dili, kontinua preokupa ho problema bé-mo’os iha sira nia bairo, maske mandatu Governu AMP besik remata ona.


Bé-mo’os nu’udar ponte ba vida umana, bé laiha povu labele moris, ida ne’e mak afirmasaun husi komunidade Bekusse no fatin seluk, sira sempre aprejenta ba governu, tamba problema bé-mo’os difikulta sira nia atividade lor-loron.


Kanalizasaun bé-mo’os iha Bairo Bekusse lá funsiona ho diak, dala ruma semana ida nia laran, sira lá asesu bá bé-mo’os e azvezes hetan bé-mo’os dala rua de’it iha semana ida nia laran.


“Semana ida bé mai dala rua de’it maibe lá kleur maran fali ona, ami tenke buka bé do’ok, ami mos tenki bá kuru iha mota laran” dehan komunidade ho tristeza.


Komunidade sira ezizi bá Governu atu hadia mekanismu serviso bá bé-mo’os, atu nune’e sira bele asesu bá bé-mo’os. 

PM Xanana Gusmao Fo Projeitu Simu 20 De Maio Bá Montana Diak Atinji Deit 50%


Notisia Husi TVTL
Kinta Kalan, 03 Maiu 2012



Governu Fo Ultimatu Bá Kompañia Montana Diak
“Simu 20 de Maiu Ho Projeitu Konstrusaun Maibe Foin Atinji 50%”


Projeitu konstrusaun bá fatin komemorasaun loron Restaurasaun Independensia iha Tasi-Tolu, foin atinji pursentu 50.


Primeiru Ministru (PM), Xanana Gusmao, fo ultimatu bá kompañia Montana Diak atu alkansa lalais nia servisu.


Hanesan ita hotu hatene katak, iha fatin ne’e, iha tinan 10 liu bá, liu-liu iha tinan 2002 Timor-Leste komemora loron restaurasaun Independensia ba primeira ves iha fatin ida ne’e.


Bá periodu tinan 2012, dala ida tan, Governu deside hili fatin ida ne’e atu komemora loron restaurasaun independensia bá tinan 10 iha fatin ida ne’e.


Tuir rejultadu projeitu emerjensia iha fatin ne’e, maske hela tan seman rua ka tolu atu komemora loron importante ne’e, maibe realidade ita hatene katak, liu-liu projeitu preparasaun ne’ebe hala’o husi kompañia Montana Diak bá iha fatin ida ne’e, oras ne’e dadaun foin maka atinji pursentu (%) 50.


Ba kestaun ne’e, antes ne’e, semana rua ou semana tolu liu ba, Primeiru Ministru, Xanana Gusmao, konsege direita vizita fatin ida ne’e hodi fo ultimatu ba iha kompañia Montana Diak hodi husu katak, tenki alkansa lalais, liu-liu projeitu reabilitasaun iha fatin ida ne’e, antes ita tama bá loron importante ne’e, maibe realidade observasaun TVTL, projeitu ne’e foin mak atinji pursentu 50.


Tuir informasaun husi kompañia ne’ebe kaer projeitu ne’e katak, maske ho neineik maibe sira optimista, sei intrega tuir tempu no sira sei finaliza tuir tempu. 


Komunidade Dili Kestiona Kualidade Servisu Ho Gasta Osan 6 Milliaun-Resin Reabilita Estrada Ba Bainaka

Notisia Husi TVTL
Kinta Kalan, 03 Maiu 2012



Povu Ezizi Governu 
“Governu Tenki Tau Orsamentu Fiksu, Se La’e, Hamosu Deit Projeitu Emerjensia Ho Laiha Kualidade”


Maske komemorasaun loron Restaurasaun Independensia Timor-Leste bá dala-10 hela tan deit loron 17 maibe, tuir observasaun jornalista TVTL nota katak, projeitu reabilitasaun estrada protokolu iha kapital Dili, ne’ebe gasta orsamentu Milliaun 6 resin, to’o oras ne’e seidauk remata.


Atu komemora loron Restaurasaun Independensia Timor-Leste ba dala-10, Governu kria politika hahu halo reabilitasaun ba dalan protokolu, ne’ebe sai hanesan vital importante ba movimentu transporte ba bainaka internasional, wainhira vizita Timor-Leste iha loron refere.


Observasaun Jornalista TVTL katak, maske loron importante besik dadaun ona, maibe prosesu reabilitasaun estradas protokolu ne’ebe gasta osamentu Milliaun 6 resin to’o oras ne’e seidauk remata.


Relasiona ho projeitu reabilitasaun ne’ebe tarde, komunidade kapital Dili husu urzenti bá kompañia nasional ne’ebe mak toma responsablidade ba projeitu refere atu finaliza lalais, tamba projeitu ne’e gasta povu nia osan no latuir planu no programa governu nian, maibe sai fali projeitu emerjensia.


Hare ba realidade ne’e, sai esperensia bo’ot ba kuartu Governu konstitusional atu iha osamentu estadu Jeral ba tinan 2013, hakarak ka lakohi tenki tau verva orsamentu fiksu bá preparasaun loron restaurasaun independensia, se lae, hamosu de’it projeitu emerjensia maibe, laiha kualidade maske tenke gasta osamentu ne’ebe bo’ot.