Kandidatu ba PR, “LÚ-OLO” kritika Governu AMP hodi konsidera governu la fo atensaun ba moras dengue hodi ohin loron ne’e moras dengue sai tiha ona probelema bo’ot iha Timor-Leste.

Photo: Aquino Vieira

Diário (12/02/2012)

Kandidatu ba Prezidenti Repúblika “LÚ-OLO” Preokupa

Dengue Sai Epidemia Bo’ot Nebe Oho Ema Nain 6

Kandidatu ba Prezidenti Repúblika, ba periode 2012-2017, Francisco Guterres “LÚ-OLO”, kandidatu husi Partidu FRETILIN, preokupa ho moras dengue nebe sai ona epidemia bo’ot iha Timor-Leste.

Dadus ikus husi HNGV Bidau, iha Fevereiru laran ne’e dengue oho ona ema nain 6 no mos pasiente dengue nain 200 resin maka sei baixa hela iha Hospital Nasional Guido Valadares (HNGV), Dili.

Moras dengue sai ona epidemia bo’ot ne’e, “LÚ-OLO” kritika Governu AMP hodi konsidera governu la fo atensaun ba moras dengue hodi ohin loron ne’e moras dengue sai tiha ona probelema bo’ot iha Timor-Leste.

“Agora dadauk deit, ita hare dengue sai tiha ona buat ida makas, labarik sira kontinua mate hela iha hospital sentral.  Hospital sentral mos la tau soru ida ba labarik sira ne’ebe maka moras hanesan dengue, ida ne’e laiha,” hateten Kandidatu ba Prezidenti Repúblika “LÚ-OLO”, wainhira halao visita iha edifisiu Jornal Nasional Diario, Farol, Dili, Kinta (23/02/2012).

“Hau nia perguntas maka, tanba saida maka ita nia povu tenki moras hanesan ne’e, se ita nai ulun sira moras hetan aimoruk diak para kura, halo nusa maka ita nia povu ne’e nia oan kikoan ne’ebe hetan moras dengue, husik soe hela deit iha ne’eba  i nein soru ida la tau ba sira nia vida?” dehan Kandidatu ba Prezidenti Repúblika, “LÚ-OLO”

“LÚ-OLO” konsidera moras dengue ne’e sai tiha ona epidemia bo’ot ida, mais laiha interese ida kona ba ida ne’e.

“Hau bele hateten lolos ona konaba agora katak, Governu ida ne’e iresponsabilidade total no inkompetente, tanba oho ema halus ninia, ne’e labele akontese, tanba saida maka ita nia povu ne’e nia oan sira tenki mate iha ne’eba, buat hirak ne’e hotu ladiak i labele atu akontese,” sublinha Kandidatu ba Prezidenti, “LÚ-OLO”

“LÚ-OLO” husu ba ukun nain sira, kuandu kaer ukun tenki i trata povu ida ne’e ho nia dignidade ida diak, tanba ukun nain hotu-hotu mesak povu nia oan, ne’e duni servi povu ho diak.

“Ita iha osan maka servi povu la ho diak, ne’e ita lasimu, se ita laiha osan maka servi ladiak, ne ita sei kompreende tanba osan maka laiha, maibe agora osan iha, ida ne’e buat ida ladiak” hateten “LÚ-OLO”

Politika ida kona ba saude nian, edukasaun ninian ho nutrisaun diak ba labarik sira nia, Estadu tenki tau atensaun ne’e.

“LÚ-OLO”  hatutan, nia parte sei ba visita HNGV iha sesta feira (24/02/2012) atu hare besik liu tan povu sira nia oan nebe oras ne’e dadaun hetan moras dengue nebe baixa hela iha HNGV, Dili.