Festa Demokrasia Iha Timor-Leste Susesu. “FSI Retira Misaun Husi TL”

Image: defence.gov.au

 Jornal INDEPENDENTE
Kuarta, 21 Marsu 2012

Governu Australia no Nova-Zelandia hahu retira Forsa Stabilizasaun Internasional (FSI) ne’ebe hala’o misaun manutensaun pas iha Timor-Leste fila ba sira nia rain.

Ministru Defeza Australia, Stephen Smith hateten, dadauk ne’e Forsa Australia no Nova Zelandia hamutuk 450 mak sai ona husi Timor-Leste.

Nia agradese ba Governu Timor-Leste ne’ebe hala’o koperasaun diak ba Forsa rua durante hala’o misaun iha Timor-Leste.

Ministru Defeza Australia mos kongratula Povu Timor-Leste ne’ebe hala’o nia festa eleisaun Prezidensial ho Pas no estabilidade iha susesu.

Nia husu atu Povu Timor-Leste hala’o nafatin segundu ronde ho pas no dame, atu nune’e, Australia, Nova zelandia, Timor-Leste no Nasoens Unidas bele deskute hodi haruka fila hotu soldadu sira ne’ebe maka sei iha Timor.

Forsa stabilizasaun Internasional husi Australia no Nova Zelandia, mai iha Timor-Leste iha tinan 2006, hafoin nasaun ne’e infrenta krizi politika.

Antes ne’e, Governu Timor-Leste mos ho UNMIT diskute ona kestaun ne’e hodi kria ekipa servisu konjuntu hodi hare misaun tranjisaun ONU nian iha Timor-Leste.

Nune’e mos, iha Vizita Primeiru Ministru Xanana Gusmao ba Portugal, iha tinan kotuk hodi hasoru malu ho Ministru Defesa Portugal, hodi husu atu forsa GNR mak sei kontinua nia misaun iha Timor-Leste.