Horta-PD Deklara Koliga Forma Governu. “CNRT Prontu Sai Opozisaun”

Image: fongtil.org

Jornal INDEPENDENTE
Kinta, 22 Marsu 2012

Kandidatu Independente ba elsiaun Prezidensial Periodu 2012-2017 Dr. Jose Ramos Horta no Partidu Demokratiku (PD) halo koligasaun hasoru eleisaun Parlamentar hodi forma Governu.

Entertantu kandidatu nain rua ne’e mos seidauk deklara sira nia pozisaun politika hodi apoiu kandidatu Francisco Guterres Lu-Olo no Taur Matan Ruak iha segunda ronda, iha fulan Abril mai.

Tuir rejultadu provizoriu hatudu ona kandidatu Francisco Guterres ”Lú-olo” hetan Votus 128.266 (28,48 Pursentu) no Taur Matan Ruak ho Votus 113.553 (25,18 Pursentu), Votus Lasama 79.654 (17,67 Pursentu), Votus Ramos Horta 80.291 (17,81 Pursentu), rejultadu ne’e hatudukatak, Kandidatu Lu-Olo no Taur mak sei konkore iha segundu ronda.

Maske Lasam no Horta latama iha segunda ronda, maibe sira foti dalan seluk halo koligasaun, tamba haree ba votus ne’ebe sira hetan iha primeiru ronde eleisaun Prezidensial hamutuk 159.944 mill.Tuir Lasama, ho numeru ne’ebe kandidatu sira hetan, hatudu ona forsa politika ida ne’ebe bot tebes.

Ba kestaun ne’e, Ramos Horta dehan, lasignifika nia tama ona iha Partidu PD atu hala’o interese partidaria nian, maibe nudar xefe do estado nia sei sai nafatin ema independenti ida, hodi suporta PD, tamba iha eleisaun primeira ronde hatudu nia apoiantes barak tebes.

“Hau tenki servisu duni ho sira (PD), iha kampania ne’ebe mai para, haree konfigurasaun politiku saida ke diak ba nasaun ne’e iha futuru,” deklara Ramos Horta.

Razaun seluk, Horta hakarak koliga ho PD, tanba PD nu’udar Partidu futuru ne’ebe mesak ema foin sa’e. Entertantu, Partidu CNRT fo kedas reasaun katak, sira pronto sai opozisaun ba partidu demokratiku no independente Jose Ramos Horta, ne’ebe hakark ukun kuintu Governu konstitusional.

“Demokrasia ne’e normal, ema hotu iha poder no kompetensia atu deside ba nebe, maibe ema ne’ebe nudar independente defisil atu hetan votus, se wainhira deside halo aliansa,” dehan adjuntu sekretariu Jeral Partido CNRT Jose fo Laran Horsehik.

Nia dehan, CNRT nunka atu halo koligasaun ho partidu FRETILIN atu forma governu, tanba defernsia ideolojia. CNRT kontinua ho nia pozisaun avansa nafatin ho nia kandidatura Taur Matan RUak, maibe atu halo negosiasaun husu apoiu kandidatu seluk hafoin halo reuniaun iha Conselho Nasional CNRT mak deside. Aliende halo koligasaun, Kandidatu nain rua (Horta no Lasama) mos seidauk deklara sira nia pozisaun ba kandidatu Prezidensial ba segunda ronde, tamba sei tetu didiak molok foti desizaun.