Koligasaun Odamatan FRETILIN Nakloke ba Sese De’it

Notisia Husi TVTL Tersa
Kalan, 20 Fevereiru 2012

“Se Kandidatu PR “Lú-Olo” Eleitu Ba Prezidenti, Sei Sai Prezidenti Ba Povu Tomak”

Kandidatu Prezidenti Republika husi partidu FRETILIN Francisco Guterres Lu-Olo iha vontade tomak atu simu apoiu husi Partidus Politikus no sosiedade sivil iha segunda volta.

Hatan konaba informasaun ne’ebe fo sai husi Jornal Nasional balun, ne’ebe dehan Francisco Guterres “Lu-Olo” lasimu koligasaun ho partidu se de’it, tersa-feira ne’e, ekipa susesu husi kandidatu ne’e rasik hatan publikasaun ne’ebe fo sai ne’e lalos, maibe kandidatu Francisco Guterres “Lu-Olo” Ba Povu Tomak ne’e, iha votade tomak atu simu apoiu husi partidu ne’ebe de’it.

“Kandidatu FRETILIN nian ne’ebe dehan lakohi koligasaun, Ne’e La-Lo’os, tamba kandidatu husi FRETILIN nian, maske sai Prezidenti mos, sei sai Prezidenti Ba Povu Tomak no iha vontade tomak simu apoiu husi Povu Timor-Leste tomak, husi Partidu Politiku, Sosiedade sivil hodi sai Prezidenti ba Povu Timor-Leste Tomak,” dehan Arsenio Bano.

Ekipa susesu ne’e mos deklara katak, Partidu FRETILIN preparadu ona atu kompete iha eleisaun segunda volta no fiar katak, kandidatu ne’e prienxe duni rekizitus atu sai Prezidenti da Repúblika Ba Povu Tomak.

Tuir informasaun ne’ebe TVTL hetan husi ekipa susesu ne’e katak, Partidu KUNTO no Kandidatu Rogerio Tiago Lobato deklara ona sira nia apoiu ba kandidatu Partidu FRETILIN Francisco Guterres “Lu-Olo” iha segunda volta.