Eis Primeiru Ministru, Dr. Mari Alkatiri ho MNE Mocambique Deskute Situasaun Politika TL

Image: daviddareparker.photoshelter.com

Jornal INDEPENDENTE
Segunda, 09 Abril 2012

“Alkatiri ho MNE Mocambique Deskute Situasaun Politika TL”

Ministru Negosiu Estrajeirus (MNE) Mocambique, Dr. Eldemiro Baloi hala’o vizita trabalhu mai Timor-Leste, Sabadu (7/4) liu ba.

Hafoin to’o iha Aeroportu Internasional, Nicolau Lobato, ita tuku 5 lokraik, MNE, Dr. Eldemiro Baloi, ho delegasaun hala’o kedas inkontro kortejia ho Eis Primeiru Ministru, Dr. Mari Alkatiri, akompaña husi Primeiru Adjuntu Sekretariu Jeral Partidu FRETILIN, Jose Maria dos Reis, iha salaun inkontru Comite Central FRETILIN (CCF), Dili.

Iha inkontru ne’e, koalia kona ba situasaun jeral Politika Timor-Leste ne’ebe hahu ona eleisaun Presidensial ba primeira ronda ne’ebe lao diak tebes no informa mos eleisaun jeral Parlamentar iha fulan Juñu agora.

“Hau simu delegasaun ne’e nu’udar maun alin nian, ami troka hanoin kona ba situasaun Mocambique, hau mos esplika oituan kona ba hau nia hanoin sobre situasaun politika iha Timor, para ita bele koñese diak liu iha rai ida-idak ninian. Hau mos koalia kona ba eleisaun primeira ronda no segunda ronda, ne’ebe sei mosu Prezidenti foun no governu foun ita seidauk hatene, tamba sei iha prosesu eleisaun laran,” dehan Mari ba Jornalista.

Nia hatutan katak, iha inkontru ne’e, MNE Mocambique Dr. Eldemiro Baloi informa mos inkontru CPLP ne’ebe sei hala’o iha fulan Julhu iha Mocambique.

Iha fatin hanesan, Dr. Eldemiro Baloi informa katak, nia parte agradese tebes vizita TL hodi hametin liutan koperasaun rai rua.

Mocambique konvida mos TL atu partisipa iha inkontru CPLP ne’ebe sei hala’o iha fulan oin.

Tuir planu MNE Eldemiro mai TL durante loron tolu sei halao inlontru mos ho Konsultadu Honariu Oscar Lima hodi koalia sobre koperasaun politika ne’ebe Mocambique atu hala’o iha Timor-Leste.