Mandatu AMP Besik Remata, Povu Kontinua Halerik

Image: guardian.co.uk

Jornal INDEPENDENTE
Segunda, 23 Abril 2012

Mandatu AMP Besik Remata, Povu Kontinua Halerik

“Hetan Bé-Mos Hanesan Hein Maromak Tu’un Husi Lalehan”

Komunidade sira iha Distritu Oekusse lá satisfeitu, tanba durante ne’e la hetan asesu ba bé-mos maske mandatu Governu AMP besik remata ona.

Komunidade sira iha Bairo Palaban no Samoro, Suku Costa, Sub Distritu Pante Makasar, Distritu Oekuse, lamenta tamba governu seidauk tau atensaun ba sira.

Komunidade Palaban, Alarico Freitas, hateten, durante ne’e komunidade iha Palaban husu atu hetan asesu ba bé-mos maibe seidauk hetan resposta pozitivu husi governu.

“Bé-mos ne’e nunka atu mai iha ami nia bairo (Palaban), iha bairo seluk bé-mos ne’e sai 24 oras, tinan ba tinan ami dudu nafatin gerobak atu lalin bé-mos husi bairo seluk,” deklara nia.

Xefe Suku Costa, Alexio Abi, informa, dala- barak ona nia parte hato’o preokupasaun kona ba bé-mos ba Governu maibe to’o ohin loron seidauk iha asaun ruma husi Governu hodi rejolve.

Iha fatin ketak, Xefe SAS Distritu Oekusse, Jose Suni, dehan nia parte presiza orsamentu atu bele halo estratejia no realiza programa ruma.