PR Horta Husu FRETILIN Atu Hametin Nafatin Pas No Estabilidade

Jornal Timor Post
Kinta, 19 Abril 2012

“PR Horta: Vitoria FRETILIN Iha Parlamentar”

Prezidenti da Repúblika (PR), Jose Ramos Horta hateten, ho rejultadu eleisaun Prezidensial segunda ronda ne’e, hatudu katak, Partidu FRETILIN sei forte tebes no sei hetan Vitoria iha eleisaun Parlamentar, tanba ne’e, nia husu ba FRETILIN atu labele triste no hametin nafatin pas no estabilidade.

“Iha eleisaun mai sei hatudu rejultadu ne’ebe diak liu, tanba ne’e, FRETILIN labele hanoin barak liu, tanba rejultadu eleisaun ne’e diak, importante mak ita tenki simu rejultadu ne’e ho paz no estabilidade hanesan FRETILIN hatudu ona,” hateten Horta ba Jornalista sira, Kuarta (18/04) iha Palasiu Prezidensial, Aitarak-Laran, Dili.

Nia hatutan, FRETILIN hanesan Partidu ne’ebe forte tebes iha nasaun ne’e no la duvidas ba nia atu konta ona iha lezislativa ne’ebe marka ona iha loron 7 Fulan Julhu.

“Iha dezapontamentu obviamente iha fileira FRETILIN nian, maibe, la presiza triste, hau dehan ba kamarada sira firme nafatin,” tenik PR. Ramos Horta.

Entertantu, Horta hateten, durante kampaña Prezidensial, Kandidatu Taur Matan Ruak hetan rekursu barak husi estadu, Governu no partidu seluk, tanba ne’e ba Taur tuir Horta, iha rekursu ne’ebe diak tebes kompara ho kandidatu seluk.

“Ne’e hanesan luta desigual, tanba FRETILIN hanesan Partidu ida no nunka hetan apoiu diretu husi partidu ruma, enkuantu iha Taur nia sorin, iha makina barak husi Governu no husi CNRT,” dehan Horta.

Maske nune’e, Horta husu ba Taur atu iha rekonsilia ho FRETILIN, presiza mos partisipasaun Xanana Gusmao nian ho haraik a’an no honestidade.

“Tenki kumpriende ho hakraik a’an no ho honestidade atu halo dialogu ho FRETILIN, tanba ita hatene FRETILIN kontribui barak ba pas husi pais ne’e durante iha tinan lima liu ba,” hatutan Horta.

“Ba Taur Matan Ruak iha tinan lima oin mai tenki sai simples, hakraik a’an, sempre halo diskursu ida ne’ebe lori rekonsiliasaun, modernasaun no iha abilidade hodi jere interese barak ne’ebe bot no lahanesan iha pais no parte reijaun,” tenik Horta.