Ró Unidade Polisia Maritimu 9 A’at Total. "SES Laiha Tempu"

Image: rickrideshorses.hubpages.com

 Jornal INDEPENDENTE
Kinta, 12 Abril 2012

Ró 9 A’at Total

“SES Konsidera UPM Nu’udar Oan Ilejitimu”

Unidade Polisia Maritimu (UPM) durante ne’e la-dun hetan atensaun masimu husi Governu, tanba to’o agora seidauk iha mudansa ba fasilidade servisu UPM.

Komandante UPM, Superintendenti, Lino Saldanha, konsidera UPM hanesan oan ilejitimu, tanba kondisaun real ba edifisiu UPM a’at tebes, tanba dezde ezistensia UPM husi tinan 2001 to’o agora seidauk iha mudansa signifikativu.

“Kondisaun ami nia mak la-premiti atu halo serviso, tanba ami nia serviso fatin de’it mos hanesan fahi luhan,” nia hateten.

Nune’e mos, ró patrulha ne’ebe mak UPM sira utiliza hodi halo servisu mos kuaze a’at hotu ona, Ró sira ne’ebe mak iha hamutuk 9 mak a’at total ona, maske nune’e, Governu liu-liu Sekretariu Estadu Seguransa nunka toma atensaun.

La’os ne’e deit, husi ró ne’en (6) ne’ebe foin lalais Governu distribui ba UPM labele halo operasaun ba Sub Distritu Atauro, tanba ró rua ne’ebe halo operasaun iha fatin ne’e a’at tiha ona.

Nia dehan, UPM durante ne’e tenta halo manutensaun iha kompañia sosa ró, maibe la-konsege tamba la-iha orsamentu espesifiku kona ba manutensaun no kombustivel ba ró nian.

Nia hatutan, foin lalais Governu sosa tan ró Patrulha ho naruk metru 30, ne’ebe sei mai iha Juñu nia laran, maibe Governu seidauk halo preparasaun ruma ba ró ne’e nia para fatin.

Ba kestaun ne’e, jornalista tenta atu konfirma problema ne’e ba Sekretariu Estadu Seguransa (SES), Francisco Guterres, maibe la-iha tempu, tanba preokupa ho reuniaun Konselhu Ministru.