Tinan 1 Povu Kontinua Konsumu Bé-Masin No Udan Be'en

Image: timorhauniandoben.blogspot.com

 Jornal INDEPENDENTE
Kinta, 19 Abril 2012

“Povu Kontinua Hasoru Krize Bé Mo’os”

Problema bé mo’os, Governu liu husi servisu Agua no Saneamentu (SAS) seidauk rejolve no halo populasaun iha kapital Dili sei kontinua hasoru krize bé mo’os.

Problema krizi bé mo’os ne’e akontese ba populasaun iha area Tasi-Tolu, Rai-Kotu, Kampung Baru Komoro nian, kuaze tinan 1 resin ona halo populasaun iha area Tasitolu Karantina Dili, konsume bé masín.

“Ami uza bé masín tasi nian, uza hodi tein, no fase roupa, maibe hemu ami kuru iha ema nia bé pump,” dehan Nelson Vicente, iha Tasi-Tolu horsehik.

Nia mos esplika tan katak, iha tempu udan sira konsume udan be’en hodi tein no fase roupa bainhira lá iha bé mo’os, maibe iha tempu bai-loro susar hetan bé mo’os.

Entertantu, Luzinha Fereira, iha Kampung Baru Komoro, dehan, problema bé mo’os, lá iha, dala barak halo sira falta no tarde ba eskola hodi tuir prosesu aprendizazen.

Luzinha, estudante Sekundaria Sao Jose Dili, maibe nia hela iha area Komoro.