CNRT Fase Liman Husi PD Ho Partidus Seluk Iha Governasaun AMP

 Jornal Timor Post
Tersa, 08 Maiu 2012

Laiha Etika Politika

“PD Hetan Kadeira La’os Tanba CNRT”

Xefe bankada Partidu Demokratiku (PD), Adriano do nascimento, hateten, kadeira ne’ebe membru PD sira okupa iha Governu no Parlamentu Nasional laos tamba Partidu CNRT mak fo, kadeira hirak ne’e povu mak fo tanba povu iha konfiansa bá PD.

Adriano hateten lia hirak ne’e bá Timor Post, Segunda (07/05), iha uma fukun Parlamentu Nasional, relasiona ho deklarasaun husi Vise Prezidenti Parlamentu Nasional, nudar mos lider ida husi Partidu CNRT nian, Vicente Guterres, ne’ebe hateten, kadeira balun ne’ebe mak Partidu seluk inklui membru PD sira oras ne’e tu’ur bá ne’e CNRT mak fo.

“Kadeira hirak ne’e ami nian duni, tantu iha Governu no mos iha Parlamentu, ne’e laos Partidu ida mak fo, ida ne’e proporsaun ida-idak ninian, laos CNRT mak fo, se enkuantu CNRT mak momentu ne’e sira to’o iha 33 ka 34 depois ami aumenta karik, sira bele dehan sira mak fo, maibe ida ne’e konta mos ho ami mak to’o hodi forma Governu AMP,” dehan Adriano.

Entertantu bá Timor Post, Adriano mos hateten, nia parte mos hakfodak ho motto ne’ebe CNRT hamosu katak Adeus AMP, Bemvindu CNRT.

Adriano afirma, AMP ne’e hari'i ho akordu ida, ne’ebe nia haktuir katak, wainhira remata mandatu tenki ho didiak, katak, Partidus hotu ne’ebe mak hamutuk hodi forma AMP ne’e tenki hamutuk maka husik AMP ho dignidade.

“Ami senti hakfodak bainhira mosu iha espanduk iha konsolidasaun partidu nian, komesa ona hateten, “Adeus AMP, Bemvindu CNRT” iha AMP mak maioria hodi ukun, tanba ne’e mak ami konsidera lá ho involvimentu ami nian, ka lá konta ho ami, ami senti ne’e lá diak,’ dehan Adriano ho tristeza.

Nia konsidera, CNRT hasai PD inklui Partidus sira seluk ne’ebe hamutuk forma Governu ne’e, ho laiha respeitu, “Memecat Ami dengan tidak hormat”, tantu ne’e bá kontestu politika no mos bá iha etika politika, ida ne’e psikolojikamente, politikamente ami senti lá diak,” hatutan lideransa PD ne’e.

Hatan bá kestaun “Adeus AMP Bemvindu CNRT”, Porta Vos bankada CNRT, Aderito Hugo, esplika bá Timor Post iha bankada CNRT Parlamentu Nasional, katak,” hau senti lia fuan sira hanesan ne’e, PD mak bele koalia bá ami, ami hakfodak se PD mak senti hanesan ne’e, tanba lia fuan ida mosu hanesan “Adeus AMP Bemvindu CNRT, ne’e lia fuan espontanista ida iha militante sira nian,”hateten Hugo.