Governu Xanana Gusmao Halo Veteranus Hadau Malu Projeitu Eletrisidade

Image: radioaustralianews.net.au

 Jornal Timor Post
Segunda, 07 Maiu 2012

“Veteranus Hadau Malu Projeitu Eletrisidade”

Membru veteranus husi Distritus 13 kuaze 300 forma hodi hahu identifika sira nia naran atu asina kontratu bá implementasaun projeitu Governu bá eletrisidade tama suku hotu iha teritoriu.

“Ohin ami mai identifika naran hodi asina atu kaer projeitu eletrisidade bá suku sira,” veteranu ne’ebe lakohi publika nia naran informa bá TP, Sabadu (05/05).

Durante formatura veteranu balun lamenta, tanba lolos lista naran ne’e taka deit iha Distritu no lá presiza haruka veteranus sira gasta osan mai hare fali naran iha Dili.

Iha parte seluk, Sekretariu Estadu Eletrisidade Agua i Urbanizasaun (SEEAU), Januario Pereira, hateten, oras ne’e Governu loke prosesu bá segunda-ronda hodi veteranus mak hetan nafatin oportunidade implementa projeitu eletrisidade tama Suku.

Januario mos seidauk bele informa lolos, tanba foin prosesu tau naran ne’ebe involvimentus veteranus husi Distritus 13, kona bá total veteranus ne’ebe kaer projeitu ne’e.

Januario mos hatutan, fundus ne’e mai husi fundus Infraestrutura ne’ebe nia parte Labele Temi Sai.

“Orsamentu ne’e bo’ot, husi fundu infraestrutura, osan barak atu halo sentral eletrisidade bá media tensaun no alta tensaun, ne’ebe prosesu normal lao dadaun hodi tama bá segunda faze,” Januario dehan.

Nune’e mos, nia dehan, oras ne’e dadaun nia parte seidauk esplika sai total veteranus hira los mak hetan projeitu, tanba ekipa avaliasaun independente ida mak sei identifika dadus no lista ne’ebe tama.