"Lú-Olo" Simu Titlu Nudar Doutor Da Lei Husi UNTL

Inaage: Claudio "Nai-Tu" Fernandes

Jornal Timor Post
Tersa, 24 Abril 2012

“Ohin, Lu-Olo Sai Doutor”

Prezidenti partidu FRETILIN, Francisco Guterres "Lú-Olo", Tersa (24/04), simu titlu nudar Doutor da Lei husi Universidade Nasional Timor Lorosa’e (UNTL).

“Hau senti kontenti bainhira ba simu graduasaun ba loron aban (ohin-red, 24/04), hau nia sentimentu mak ne’e, antes hau halo graduasaun, hau halo buat barak ona maske ho obstaklu oi-oin, estuda barak durante tinan 24 iha luta armada depois mai tan liu husi Asembleia Konstituante ne’ebe hau rasik lidera hodi halo ita nia konstituisaun, ikus mai hau estuda tan lei iha UNTL,” eis Prezidenti PN ba Jornalista sira iha katedral, Dili, segunda (23/04, hafoin partisipa iha misa agradesementu ba finalista UNTL ne’ebe prejidi husi Bispu Dioseze Dili Don Alberto Ricardo.

Tuir Lú-Olo, titlu ne’ebe nia simu hanesan meus ida atu bele kompriende diak liu tan sosiedade no instituisaun Estadu no relasaun ema ho estadu.

Veteranu ne’e estuda iha Fakuldade Direitu UNTL iha tinan 2005 liu-ba, iha momentu eskola iha universidade refere, nia sei sai hanesan Prezidenti Parlamentu Nasional.

Enkuantu, Bispu Dioseze Dili, Don Alberto Ricardo da Silva hateten, husu atu kultura tenke nabilan nafatin iha Universitariu no buka servisu hadiak nasaun no povu nia moris.