SES Lá Interese Ró Patrulha UPM 9 A'at No Hela Deit 4 Maka Funsiona

Jornal INDEPENDENTE
Tersa, 08 Maiu 2012

“Ró Polisia Maritimu Hein Governu Foun Mak Rezolve”

Komandu Jeral Polisia Nasional Timor-Leste (PNTL), rekoinese katak, ró patrulha husi Unidade Polisia Maritima (UPM) a’at duni, maibe seidauk iha planu atu hepara fali ró hirak ne’e.

Adjuntu Komandante Jeral PNTL, Komisariu Afonso de Jesus, hateten, prosesu atu troka ró hirak ne’e presiza tempo naruk, tanba ne’e, Komandu PNTL seidauk bele determina bainhira mak bele hadia ró hirak ne’e.

“La’os agora maibe iha futuru ita tenki hare,” tenik nia, iha nia servisu fatin, Kaikoli, Dili (07/05).

Tuir deklarasaun husi Komandante UPM, Lino Saldanha, katak, ró patrulha UPM nian hamutuk 13, maibe 9 mak a’at ona no hela 4 deit mak bele funsiona.

Maske problema ne’e mosu iha unidade UPM, maibe seidauk iha desizaun politika husi Sekretariu Estadu Seguransa (SES) hodi hadia ró ne’e.