Longuinhos: "Se hetan hetan ema ne’ebe kria problema, sei tiru deit."

Foto: easttimorlegal.blogspot

Suara Timor Lorosae (22/02/12)

PNTL Sei Tiru Autor Problema Kalan

Dili – Komandante Jeral Polisia Nasional Timor-Leste (PNTL) organiza hikas fali ninia membru sira hodi kontinua halo operasaun iha tempu kalan, tanba hare ba problema barak ne’ebe komesa akontese fali iha rai laran.

“Karik iha tempu kalan, ema ruma gosta kria problema, ami sei la tolera tan ka perdua. Se hetan hetan ema ne’ebe kria problema, sei tiru deit. Tantu, hodi oin ba oin PNTL halo operasaun iha tempu kalan, hau sei haruka sira uja kilat, tanba ne’e demais liu ona, gosta kria mak problema iha komunidade nia le’et”, dehan Komandante Jeral PNTL, Komisariu Longuinhos Monteiro ba jornalista sira iha ninia kna’ar fatin, Kuartel Jeral PNTL, Kaikoli, Dili, Tersa (21/02/12).

Nia hanoin problema ne’ebe mosu bebeik, bele sai amiasa bo’ot ba kandidatu Prezidenti Repúblika sira, ne’ebe oras ne’e prepara a’an hela atu halo kampaña eleitoral.

“Ida ne’e mos hanesan amiasa bo’ot id aba iha kandidatu sira ne’ebe agora dadauk atu halo sira nia kampaña. Ne’e duni, ba agora daudaun, PNTL sei la tolera ema ne’ebe gosta kria bebeik instabilidade iha bairu-bairu, liu-liu iha kapital Dili”, katak Longuinhos.

Longuinhos mos informa, agora daudaun PNTL sei koordena hamutuk ho FALINTIL-Forsa Defeza Timor-Leste (F-FDTL), atu bele hamutuk buka tuir ema ne’ebe maka gosta kria problema iha rai laran. Desizaun ne’ebe foti ona maka kuandu hetan ema ne’ebe maka halo problema, diak tiru deit iha ain, hodi hatudu mos ba ema seluk atu halo problema karik, tenki hanoin dala sanulu maka kria problema. Ida ne’e importante tanba se la halo nune’e, komunidade maka paniku hela deit ba hahalok sira hanesan ne’e.

Iha parte seluk, Komandante Operasional PNTL, la fo’o komentariu kona ba asuntu ne’e, tanba desizaun hotu iha Komando Jeral nia liman.