Vizita Espoza Kandidatu PR Lu-Olo Ba Uma Mahon “Direitu Feto Inklui Labarik Ki’ik Sei Diskrimina”

Timor Hau Nia Doben (Quinta-feira, 23 de Fevereiro de 2012 / 20h39)

Tinan barak ona Timor Leste ratifika ona Konvensaun (CEDAW) no direitu labarik nian, maibe feto no labarik kiik sira sei infrenta situasaun difisil, tanba la hetan atensaun husi parte kompotente.

Iha dadus ne’ebe identifika, feto barak sei infrenta viiolasaun sexual husi ema ne’ebe laiha responsablidade no maioria labarik kiik enfrenta mal nutrisaun, liliu husi povu kiik nia oan sira.

Situasaun ne’e, motiva no inspira maka’as ba Cidalia Lopes Nobre Mouzinho Guterres, espoza Kandidatu Prezidenti Republika, Francisco Guterres Lu-Olo hodi hala’o nia vizita ba fatin hirak ne’ebe durante ne’e sai mahon ba vitima sira.

Nia dehan, durante nia vizita ba uma mahon sira hanesan Casa Vida, Orfanatu madre sira, FOKUPERS, ISMAIK, no seluk tan, identifika feto barak ne’ebe hetan violasaun sexual, violensia domestika no labarik kiik sira ne’ebe infrenta malnutrisaun.

“Ne’e preokupasaun boot, nu’udar inan ida, hanesan mos inan sira seluk, tanba ne’e situasaun ne’e tenki prevene,” dehan nia foin lalais ne’e.

Tanba ne’e, Espoza kandidatu PR ne’e dehan, husi vizita ne’ebe nia halo sei identifika no rekoilla mos informasaun barak husi vitima, atu sai hanesan programa ba futuru, liliu governu foun mai hodi rejolve ho diak.

“Ita labele hein deit ema husi liur mai mak identifika fali ita nia problema, loloos ita rasik maka tenki preokupa ba malu,” hatutan nia.

Cidalia dehan tan, nia parte mos sei aprejenta dadus hirak ne’ebe identifika ona ba dirasaun partidu FRETILIN atu tau hanesan planu ida hodi bele implementa bainhira kaer fali ukun iha 2012 ne’e.

Tuir planu ne’ebe mak iha, sei kontinua halo vizita ba fatin hirak ne’ebe identifika ona iha fulan ida ne’e nia laran, tanba, fatin balun ne’ebe hetan vizita seidauk hetan apoiu husi Governu to’o agora.
.