AAP: Informasaun Hamosu kona-ba Intimidasaun Hasoru Votante Sira Iha Timor-Leste

AAP: Informasaun Hamosu kona-ba Intimidasaun Hasoru Votante Sira Iha Timor-Leste

Kuarta, 7 Marsu 2012

Preokupasaun mosu kona-ba posibilidade katak iha intimidasaun hasoru votante sira iha distritu balu iha Timor-Leste husi militár sira ne’ebé fiél ba sira-nia eis xefe no kandidatu prezidensiál Taur Matan Ruak.

Timór-oan sira sei vota iha loron 17 fulan Marsu nu’udár segunda eleisaun livre atu hili prezidente iha nasaun ki’ik-oan ne’e hafoin independénsia iha dékada kotuk.

Maske kandidatu forte balu, inklui preidente José Ramos-Horta, minimiza tiha ona risku atu hamosu tan violénsia ne’ebé akompaña eleisaun iha 2007, obzervadór sira iha kampu hatudu ona sira nia reseiu kona-ba poténsia ba konflitu foun atu mosu.

‘Ha’u iha garantia kompletamente kona-ba seguransa,’ Dr Ramos-Horta dehan ba AAP.

‘Ami-nia polísia ho polísia Nasoins Unidas nian alerta hela iha rai-laran tomak. Sira iha experiénsia maka’as durante tinan hirak nia laran atu halo avaliasaun kona-ba situasaun, atu responde ba ameasa seguransa antes akontese, ne’e duni ha’u konfia tebtebes katak buat ne’e sei la’o ho di’ak.’

Maibé iha preokupasaun ida ne’ebé foin mosu, sasin sira fó-hatene katak sira haree membru militár envolve diretamente iha kampaña ba Sr Ruak, ema hotu-hotu koñese nu’udár TMR, ne’ebé rezigna ona husi kargu xefe forsas armadas nian iha tinan 2011.

Sasin sira hetan soldadu sira iha lansamentu ba ninia kampaña iha Dili iha semana kotuk, i ikus mai iha distritu sira seluk, fó hela apoiu ba Sr Ruak, inklui iha Baucau, eleitoradu importante ida atu manán prezidénsia.

Lei iha Timor-Leste bandu soldadu ativu sira atu involve diretamente iha kampaña eleitorál.

Iha mós informasaun katak soldadu sira, ho farda, mak fahe material kampaña nian ne’ebé apoia Sr Ruak iha distritu Same iha kosta sul Timor-Leste nian.

Sasin sira mós hatete katak soldadu sira ne’e kaer kilat, i sira mosu ho karreta F-FDTL nian.

Ema hotu-hotu haree katak eleisaun prezidensiál ne’e hanesan kompetisaun ida entre kandidatu na’in 3: Sr Ruak, ne’ebé iha apoiu husi Primeiru Ministru Xanana Gusmão nia partidu CNRT, Dr Ramos-Horta ho Francisco Guterres husi FRETILIN.

Xefe F-FDTL nian, Major-Jenerál Lere Anan Timur, aviza ona iha fulan kotuk katak membru forsas armadas nian, enkuantu livre atu fó sira-nia apoiu liu husi votasaun, sira labele envolve diretamente iha kampaña eleitorál.

Nia refere ba ida ne’e nu’udár ofensa ida sériu tebtebes, i sei foti medidas hasoru membru F-FDTL sira ne’ebé mak fó-apoiu diretamente ba kualkér kandidatu ida nia kampaña eleitorál.

Iha tinan 2006 violénsia iha Timor-Leste kuaze lori nasaun ne’e ba funu sivíl enkuantu iha 2007 konflitu arrebenta filafali, hafoin atentadu ida hasoru Dr Ramos-Horta ho Primeiru Ministru Gusmão iha 2008.

Violénsia iha 2006 ne’e loke dalan ba forsa internasionál tama iha rai-laran, inklui tropa na’in 400 husi Austrália.

Hamutuk ho kontinjente ida kuaze ema 1000 husi forsa seguransa Nasoins Unidas nian, sira hotu-hotu iha planu atu retira hafoin eleisaun parlamentár, ne’ebé sei hala’o iha fulan Juñu.