Eleisaun iha Distritu Baucau Akontese Iregularidade, Deskonfia Halo Husi STAE

Image: blogs.sacbee.com

Jornal Timor Post
Tersa, 20 Marsu 2012

Urna Ilegal Mosu Iha Baucau

Eleisaun iha Distritu Baucau akontese iregularidade iha Suku Buibau, ne’ebe deskonfia halo husi STAE, tamba mosu derepente urnas tolu husi Suku Buibau iha Administrasaun Distritu Baucau.

“Agora problema boot liu maka, iha tres (3) kaixa ne’ebe mai husi Buibau ninian,” deklara Cipriana Pereira, husi fiskais Kandidatu Francisco Guterres "Lu-Olo" ba jornalista sira iha salaun Apuramentu Nacional, Kolmera, Dili, Segunda (19/03).

Nia konta katak, kaixa 3 husi Buibau nian, loloos tama ona iha STAE Distritu Baucau iha sabadu tuku 12 kalan, maibe iha loron tuir mai (Dominggu) bainhira atu halo rekonsilidasaun ba iha boletin sira ne’ebe nolu, derepenti deit mosu tan urna 3 husi Buibau tama ba iha edifisiu administrasaun.

“Ida ne’e maka ami halo interogasaun no momentu ne’e kedas ami deskonfia katak, tamba sa maka kaixa sira hotu-hotu iha ona administrasaun, maibe kaixa tolu ne’e derepenti iha Domingu tuku 4 lorokraik sira lori fali husi liur hodi tama ba iha administrasaun.

Entertantu, Francisco Ximenes hanesan mos fiskais husi kandidatu taur Matan Ruak husi Suku Buibau hateten, tuir relaidade ne’ebe maka iha katak, iha suku Buibau ne’e iha kaixa 3 mak uza hodi halo votasaun, no hafoin votasaun kalan ne’e kedas urna 3 ne’e lori ba Baucau, maibe iha dadersan mosu fali katak, iha Suku Buibau nian iha kaixa 6, ida ne’e maka halo fiskais sira halo konfuzaun no deskonfia mosu iregularidade.

“Ami hatene iha kaixa tolu iha suku Buibau nian no husi rejultadu ne’e maka, Taur Matan Ruak hetan votus 683, no "Lu-Olo" hetan votus 1016, hafoin remata, iha kalan ne’e kedas lori ba Baucau maibe derepenti sai fali kaixa 6, tamba ne’e maka ami deskonfia,” nia hateten.

Ba problema ne’e, fiskais sira konsidera katak, ne’e hanesan krime, kazu ne’e fiskais sira hato’o ona ba Polisia Distritu Baucau atu bele prosesa autor ba investigasaun.