Eleisaun PR Segundu Ronde LÚ-OLO Optimista Sei Manan

Jornal INDEPENDENTE
Tersa, 20 Marsu 2012


Kandidatu Prezidenti Repúblika (PR) ba periodu 2012-2017, Francisco Guterres “Lú-Olo” ne’ebe hetan votus maioria simples iha primeira ronde optimista maka’as katak, sei manan iha segundu ronde.


Eleisaun ba segundu ronde sei hala’o iha fulan Abril nian laran, hafoin halo loron 30 depois Tribunal Rekursu fo sai rejultadu.

Liu husi konferensia imprensa horsehik iha Sede Kampaña Prezidensial “Lú-Olo” hatete, nia parte satisfas ho rejultadu eleisaun refere hodi sai primeiru lugar no oprimista makas hodi manan iha eleisaun segundu ronde ne’e.

“Hau optimista atu ba iha segunda ronde, hodi manan iha segunda ronde,” deklara Lú-Olo.

Lú-Olo hatutan, eleisaun agora lao iha situasaun diferente kompara ho eleisaun iha 2007, tanba iha ambiente ne’ebe hakmatek, maske iha fatin balun mosu insidenti ki’ik iha tempu kampaña.

“Iha 2007, populasaun balun hetan ameasadu maibe agora situasaun ne’e kondis ona hodi populasaun ida-idak ezerse nia diretu vota ba kandidatu sira,” haktuir Lú-Olo.

Tanba ne’e, Kandidatu PR Lú-Olo dehan, maske hasoru dezafiu iha segunda ronde maibe fiar katak sei susesu hodi sai Prezidenti Repúblika.

Husu konaba karik kandidatu seluk fo apoiu ba nia kandidatura, Lú-Olo informa oras ne’e dadaun nia ekipa susesu servisu maka’s hela, no balun iha ona fase negosiasaun entre kandidatu seluk ne’ebe la liu iha primeiru ronde.

Ba kestaun ne’e, Kandidatu Prezidenti Republika Jóse Ramos Horta dilemma atu deklara fo nia apoiu ba kandidatu nain rua ne’ebe tama iha segundu ronde, maibe Horta hateten, bainhira nia mandatu remata iha fulan Maiu, nia sei deklara nia pozisaun apoiu partidu ou nu’udar ema independente nafatin.

Entertantu, kandidatu Fernando Lasama de Araujo mos seidauk bele deklara nia apoiu ba kandidatu ida, tamba Partidu Demokrátiku mak iha poder liu atu foti desizaun