Estudante Husu Altera Lei Eleitoral

Image: timortoday.com

Jornal INDEPENDENTE 
Kuarta-feira, 07 Marsu 2012

Estudante Husu Altera Lei Eleitoral

 
Estudante sekundaria no Universitariu sira iha kapital Dili husu ba Governu liu husi Comisaun nasional Eleisoens (CNE) no STAE atu altera lei eleitoral ne’ebe laprimiti eleitor sira atu vota livre iha fatin ne’ebe sira hela ba, maibe tenki vota tuir fatin ne’ebe sira rejistu ba.

Ba kestaun ne’e, segunda (05/03) membru Parlamentu Nasional mos preokupa kestaun ne’e, tamba eleitor barak ne’ebe oras ne’e estuda iha kapital Dili, sei la tuir vitasaun iha sira nia distritu rasik ho razaun orsamentu atu selu transporte publiku ba distritu ida-idak.

Eleitor rejistradu atu tuir eleisaun presidensial hamutuk 626.503, maibe husi numeru ida ne’e barak maka sei la vota tamba, tenki dezloka ba sira nia hela fatin hodi vota.

Manuel Soares, Estudante UNITAL Departementu Relasaun Internasional dehan, sira triste bainhira la fo votus, ba kandidatu Prezidenti ne’ebe sira hakarak hili.

“Ami triste bainhira ami la vota, tamba ne’e husu ba PN, Estadu no Governu atu muda lei ne’e,” dehan nia ho tristeza, horsehik.

Nune’e mos estudante Joaquim dos Santos, Estudante tekniku professional Sao Miguel Dili hateten, lei eleitoral ne’e se la altera sei fo impaktu ba sira, tamba lakon direitu nudar Timor oan bainhira la tuir eleisaun hodi hili lideransa ne’ebe atu ukun rai ida ne’e.

“Ami la hili ami sei lakon direitu durante tinan 5, tamba ami la hili ami nia lideransa ba rai ida ne’e,”dehan nia.

Tanba ne’e nia husu, atu altera lalais lei ne’e, atu nune’e sir abele tuir eleisaun iha fatin ne’ebe deit, se la’e sira mak sai vitima ba prosesu demokrasia iha Timor-Leste hodi hili sira nia lideransa.