Francisco Guterres "Lu-Olo": Hau Sei Sai Prezidenti Ba Povu TL Tomak

 
Jornal INDEPENDENTE 
Kuarta-feira, 07 Marsu 2012
 

Francisco Guterres "Lu-Olo": Hau Sei Sai Prezidenti Ba Povu TL Tomak

 
Kandidatu Prezidenti Republika ba Periodu 2012-2017 Francisco Guterres Lu-olo, komprementa ba nia apoiante sira iha Distritu Ainaro katak, nia sei sai Prezidenti ba partidu politiku hotu-hotu no ba povu Timor-Leste tomak,” Lu-Olo hateten ida ne’e iha nia kampania Distritu Ainaro (06/03).

Nia dehan Timor oan hotu labele iha hanoin naksalak ba malu hanesan saida maka akontese iha krizi 2006.

Husi krizi 2006, Lu-Olo dehan, nia aprende hodi hakarak sai Prezidenti Republika ida ne’ebe maka ba partidu politiku hotu-hotu no ba povu tomak.

Lu-Olo dehan, nia sei la muda konstituisaun RDTL, tamba konstituisaun RDTL hakerek hodi ruin no ran nudar alerse hodi hari nasaun ida ne’ebe bolu Timor-Leste.

Respeita konstituisaun no respeita kompetensia instituisaun ida-idak nia diretu, hanesan, PR, PN, Governu no Tribunais tuir definisaun de poderes ne’ebe maka komunga ona iha konstituisaun RDTL.

Lu-olo mos dehan, sei defende nafatin vontade povu Timor-Leste nian iha rai liur, tanba vontade povu maka nasaun nia vontade,” dehan nia.

Entertantu Sekretariu Jeral partidu FRETILIN Dr. Mari Alkatiri ne’ebe hola parte mos kampanha Kandidatu PR Lu-Olo hateten, atu lori povu Timor-Leste sai husi mukit, kiak no defende oan kiak no faluk sira nia deretu laos ema ida ka rua deit maka bele defende maibe presiza Timoroan hotu hamutuk no fo kontribuisaun.