Kaju Nepotizmu Ministra Lucia Lobato Adianta

easttimorlegal.blogspot.com

Notisia Husi TVTL 
Kuarta Kalan, 14 Marsu 2012

Kaju Nepotizmu Ministra Lucia Lobato Adianta
“Bancada FRETILIN: Tuir Lei PM no Konsellu Ministru Mos Bele Hola Medidas”

 
Kazu Ministra Justica, Lucia Lobato, rejista iha Tribunal Distrital Dili ho numero 580/2011 ba kazu farda Guarda Prizionais no mos prosesu konstrusaun edifisiu Konservatoris Rejistu Civil iha distritu.

Iha kazu ne’e Ministeriu Publiku alega Minitra Justica Lucia Lobatu no Antonio Araujo Freitas nu’udar Funsionarius Publiku iha Ministeriu da Justica hanesan arguidu.

Iha prosesu julgamentu ne’e la konsege hala’o julgamentu, tamba Parlamentu Nasional seidauk hasai imunidade ba Ministra Justica, Lucia Lobato.

Rajaun Parlamentu Nasional to’o oras ne’e seidauk hasai imunidade ba Ministra Justica Lucia Lobato tamba membru Parlamentu Nasional la prense korum.

Ba kestaun ne’e, deputadu husi Bancada FRETILIN Joaquim dos Santos hateten, lolos Parlamentu Nasional la presiza hasai imunidade ba Ministra Justica Lucia Lobato, maibe Primeiru Ministru Kay Rala Xanana Gusmao iha poder atu hasai membru do Governu ne’ebe deskonfia involve iha aktu korupsaun.

“Primeiru Ministru tuir konstituisaun iha obrigasaun Politika atu hola medidas politikas, labele so’e fali todan mai iha Parlamentu Nasional, hanesan tempo Jesus nian ba kazu Pilatus ne’e, tamba iha kontituisaun iha parte 2 mak ita labele kahor, se koalia kona ba membru Parlamentu Nasional, Parlamentu maka tenki foti desizaun, se koalia kona ba membru Governu, Primeiru obsaun Primeiru Ministru maka tenki hola desizaun ou Konselhu Ministru,” dehan Deputadu FRETILIN ne’e.

Entertantu Deputadu husi Bancada CNRT Aderito Ugo rekoinese katak, iha informasaun ne’ebe nia rona, Ministra da Justica Lucia Lobato hato’o ona karta rejignasaun ba Primeiru Ministru Kay Rala Xanana Gusmao.

Tribunal Distrital Dili deside, Julgamentu ba Kazu Ministra Justica Lucia Lobato sei hala’o hikas iha loron 23 fulan Marsu tinan ida ne’e, ho testamunha hamutuk 13.