Kampaña Kandidatu PR Lu-Olo Iha Distritu Ainaro

Notisia Husi TVTL
Tersa Kalan, 06 Marsu 2012

Kampaña Kandidatu PR Lu-Olo Iha Distritu Ainaro

“Francisco Guterres Lu-Olo: Wainhira Sai Eleitu PR Sei Dignifika Luta Nain Sira”

Kandidatu Prezidenti Republika Francisco Guterres Lu-Olo, wainhira eleitu sei koopera hamutuk ho governu hodi valoriza no fo dignifika ba luta nain sira hodi tau matan ba ferik no katuas sira, komprimisiu ne’e hala’o wainhira hala’o nia kampaña ba dala hitu iha ditritu Ainaro, Tersa-feira (06/02) horsehik.

Kandidatu ho numeru sorteiru 3 Francisco Guterres Lu-Olo ho komitiva to’o iha distritu Ainaro, simu diretamente husi lia nain sira tuir lisan Distritu Ainaro nian, antes hahu kampaña, kandidatu Lu-Olo ne’ebe akompaña husi Sekretariu Jeral FRETILIN Mari Alkatiri, fo um minutu de silensiu, nu’udar Honra ba Proklamador Francisco Xavier do Amaral no Herois sira seluk.

Iha kampaña ne’ebe hala’o iha Distritu Ainaro ne’e, Francisco Guterres Lu-Olo hala’o nia deskursu hateten, karik eleitu nudar Prezidenti, sei kopera ho Governu hodi valoriza no fo dignidade ba luta nain sira.

“Ita haree, to’o ohin loron Veteranus no antigu kombatentes sei malahuk hela nafatin de’it, ita halo tiha lei iha PN hodi dignifika ita nia luta nain sira, maibe ema ne’ebe maka la-veteranu sira maka simu tiha fali, ema ne’ebe maka veteranu sira tur hodi hein hela nafatin,” dehan Lu-olo.

Nune’e mos, tuir Lu-Olo karik hetan konfiansa husi povu, nia sei servisu hamutuk ho governu hodi tau matan ba ferik no katuas sira iha nasaun ida ne’e.

Maske udan durante kampaña, maibe militante no apoiante sira nafatin akompania to’o remata.