Komunidade Hato’o Proposta Ba Governu Laiha Rejultadu

Image: timorhauniandoben.blogspot.com

Notisia Husi TVTL
Domingu Kalan, 11 Marsu 2012

Komunidade Hato’o Proposta Ba Governu Laiha Rejultadu
“Mota Bidau Santana Fo Ameasa Ba Komunidade Nia Hela Fatin”


Xefe Aldeia Manu Mate, Suku Bidau Santana, Fernando Misquita, husu ba Governu atu halo varazen ba mota Bidau ne’ebe besik sira nia hela fatin, tamba fo ameasa ba komunidade nia hela fatin.

Mota Bidau ne’ebe liu husi Aldeia Manu Mate ora ne’e dadaun fo ameasa ba estrada no uma komunidade ne’ebe hela besik mota refere. Ho kondisaun ameasadu ne’e, xefe Aldeia Manu Mate, lori komunidade Suku Bidau nia naran, husu orjenti ba Governu atu hala’o varazen ba mota ne’ebe refere, tamba wainhira tempu udan bele sobu estrada no bee hodi tama komunidade nia uma.

“Mota ne’e besik sobu ona komunidade nia uma, maibe to’o agora Governu la fo desizaun atu halo buat ruma,” dehan Fernando Mesquita.

Fernando Mesquita informa katak, dala barak ona halo proposta ba ministeriu Infra-estrutura, Gabinete Primeiru Ministru, inklui Gabinete Prezidenti Republika, maibe to’o oras ne’e seidauk iha resposta inmediatu hodi halo barazen ba mota ne’ebe besik iha sira nia hela fatin.

“Ami senti laran triste teb-tebes, tamba duranti ne’e, ami nia proposta barak maka ami haruka ba, maibe to’o agora laiha rejultadu,” dehan Fernando ho tristeza ba ukun Governu AMP nian.

Ekipa TVTL nota iha terenu katak, Mota Bidau wainhira udan boot bele sobu estrada no uma komunidade kuandu Governu la-halo lalais barazen.