Lamentasaun Komunidade: Promete Governu La Realiaza No Halo Povu Maka Terus

Image: timorlorosaenacaodiario.blogspot.com

Notisia Husi TVTL
Sabadu Kalan, 10 Marsu 2012

Lamentasaun Komunidade: Promete Governu La Realiaza No Halo Povu Maka Terus
“Komunidade Konsumi Bee-Mota Ba Nesesidade Loro-loron”

Komunidade Aldeia Terus Nain, Suku Comoro, durante loron 3 konsumi bee-mota hodi fase roupa inklui uza ba hari’is, ba kestaun ne’e, tamba kanu bee-mos iha area ne’eba hetan estraga husi bee mota.

Komunidade ne’ebe hela iha Aldeia Terus Nain, oras ne’e dadaun susar atu hetan bee-mo’os, tamba ne’e sira obriga uza bee-mota maloa nian hodi fase roupa, hari’is, no uza ba hemu lor-loron. Labarik balun oras ne’e moras tamba konsumi bee merak, entertantu estudante iha semana ne’e labele ba eskola, tamba falta bee-mo’os, besik semana ida ona labarik inklui estudante sira tenki lalin be’e to’o mota Ulun Aldeia Terus Nain.
 
“Labarik balun moras, mehar tamba uza be’e-foer husi mota,” Lamenta komunidade.

Xefe Aldeia Terus Nain, Ana Soares, no komunidade informa katak, antes Governu ida ne’e ukun promete ona ba povu katak atu dada be’e-mo’os ba komunidade, maibe nunka realiza. Ba kestaun ne’e loron hirak ona sira konsumi de’it be’e-mota hodi fase roupa no hari’is inklui hemu, ne’ebe fo impaktu ba sira nia oan nia saude, tamba ne’e husu ba parte governu hodi fornese lalais be’e-mo’os ba komunidade.

“Governu ida ne’e sa’e, dehan atu hadia povu. Promete nunka realiza nia promete, povu agora hakarak moris ho buat 3 deit ba povu nia hakarak, Bee mos, Estrada, Saude no eskola, ida ne’e mak importante liu, promete tiha mas la realiza, halo povu mak terus hela deit,” deklara komunidade ho triteza.

Entertantu Ekipa TVTL nota iha terenu katak, falta be’e-mo’os iha Aldeia Terus Nain, Suku Vilaverde ne’e halo labarik sira tenki ba mota laran buka be’e-mo’os, hodi ba eskola tamba bee iha uma laiha.