Aimoruk Iha HNGV Menus, Povu Sosa Rasik Aimoruk Iha Farmasi Privado no Hasai Ran Selu US$ 20.00 ou UU$ 25.00

Image: asia-pacific-action.org

Notisia Husi TVTL
Tersa Kalan, 17 Abril 2012

Povu Lamenta Ba Situasaun HNGV

“Aimoruk Iha HNGV Menus, Povu Sosa Rasik Aimoruk Iha Farmasi Privado no Hasai Ran Selu US$ 20.00 ou UU$ 25.00”

Pasiente iha sala izolamentu Nasional Guído Valadares lamenta ho fasilidade hospital ne’ebe la-saudavel tamba fo impaktu ba sira nia saude.
Pasiente sira mos kestiona kona bá, menus aimoruk iha Hospital Nasional Guído Valadares (HNGV).

Lamentasaun ne’e hato’o husi familia pasiente no pasiente ne’ebe hala’o hela tratamentu iha sala ijolamentu Hospital Nasional ne’ebe lamenta ho kondisaun iha sala ijolamentu tamba kulsaun ba pasiente kuaze a’at hotu no mos saneamentu ladiak.

“Kulsaun ne’e kulsaun antigu verdade, ami toba hader mai kotuk laran ne’e hanesan ema lori ai mak baku. Bė mo’os mos la-iha, ema sira ne’e halo serviso maibe bé mak la-iha. Sintina mos ida deit ami tenki antri husi iha ne’e to’o iha ne’eba. Doutor sira mos mai dadersan de’it, meudia la-iha, atu atende moras ne’e la-iha,” dehan pasiente sira.

Pasiente sira mos lamenta ho aimoruk iha Hospital Nasíonal hodi obriga sira tenki ba sosa iha farmasi privada.

“Hau tenki sosa aimoruk hodi fo hau nia oan, tamba, aimoruk la-iha. Ne’e nasaun ona, ne’e la’os Indonesia mak ukun ita, ita nasaun tiha ona maibe tamba saida mak aimoruk deit mos laiha, entaun osan estadu nian ba iha ne’ebe?! Aprova osan bar-barak ne’e ba iha ne’ebe?! Ami hasai ran deit mos selu Us$20 ou US$25, ne’e tamba sá? Ema iha osan ne’e diak maibe ami osan la-iha ne’e oinsa?! Aimoruk la-iha ne’e Governu tenki sosa ka!!!! Labele povu mak sosa fali, se povu sosa fila fali entaun ita ne’e la’os nasaun,” dehan familia pasiente.

Familia pasiente mos informa katak, hahan ne’ebe prepara ba pasiente iha sala ijolamentu la-tuir menus saude nian, nune’e bele implika ba pasiente sira nia saude.