Kampaña Kandidatu PR “Lu-Olo" Iha Segunda Volta Sei La Fahe Povu

Notisia Husi TVTL
Segunda Kalan, 02 Abril 2012

Kampaña Kandidatu PR Iha Segunda Volta

“Lu-Olo Sei La Fahe Povu Ba Lorosa’e No Loromonu, Tamba Sei Sai PR Ba Povu Tomak”

Kandidatu Prezidenti da Republika Dr. Francisco Guterres “Lú-Olo” promete, wainhira eleitu sei kontinua defende subsidiu ba veteranus no mos idozus, aliende ne’e “Lu-Olo” mos promete Timor-Leste nia naran iha komunidade Internasional no utiliza ninia kapasidade intelektual hodi halo diplomasia atu Timor-Leste adere ba ASEAN.

Kandidatu Prezidenti Dr. Francisco Guterres “Lú-Olo” ho nia aliadu sira dezloka ba sub Distritu Maubisse, Distritu Ainaro, hodi hala’o kampaña ba dala rua iha segunda volta.Iha kampaña ne’e komunidade simu ho tradisional tuir kultura rai ne’eba nian.

Iha abertura kampaña ne’e, Kandidatu Prezidenti “Lú-Olo” hato’o nia promesas ba komunidade Sub-Distritu Maubisse, kandidatu ne’ebe mais votadu iha primeira ronda ne’e hateten, karik eleitu sai Prezidenti da Repúblika sei lori povu husi nakukun ba naroman hodi hadia povu nia moris tuir nia kna’ar.

“Tempo to’o ona atu ita hateke ba oin, atu oinsa bele hadia povu ida ne’e nia moris, oinsa mak ita nia joventude sira hamutuk ho ita atu serve rai ida ne’e, oinsa mak iha be’e-mo’os ba povu ida ne’e, oinsa mak bele asesu estrada ba povu ida ne’e, oinsa mak bele iha eletrisidade ba povu ida ne’e, oinsa mak bele ita nia oan ho kondisaun eskola ne’ebe diak, oinsa mak osan bele buras iha povu ida ne’e nia liman, ida ne’e mak hau nia luta mos,” deklara “Lú-Olo” iha nia kampaña.

Lú-Olo akresenta katak, wainhira sai Prezidenti ba Povu tomak, sei garantia konstituisaun hodi hametin paz, estabilidade, unidade nasional no sei la fahe povu ida ne’e ba Lorosa’e no Loromonu.

“Hau Lu-Olo Hamrik iha povu ida ne’e nia oin atu hateten katak, hau sei garante pas, unidade nasional hodi lori estabilidade iha ita nia rai laran, hau sei la fahe Povu ida ne’e ba Loromonu no Lorosa’e, hau sei hakuak povu ida ne’e husi Tutuala ba to’o iha oekusse liu husi rai klaran, ita ida de’it, povu ida de’it, inan ida de’it, aman ida de’it, ida ne’e mak haforsa hau hodi kandidatu ba Prezidenti da Republika atu sai Prezidenti ba Povu tomak,” deklara tan Lú-Olo.

Lú-Olo mos pronto atu kompete ho ninia aversariu tamba nia iha aliansa forte nune’e nia iha konfiansa atu manan iha eleisaun segunda ronda.