Bancada FRETILIN Ezizi PNTL Halo Investigasaun Ba Aderito Da Costa Domin

Notisia Husi TVTL
Tersa Kalan, 27 Fevereiru 2012

Bancada FRETILIN Ezizi PNTL Halo Investigasaun

“Xefe Suku no Populasaun Iha Suku Triloka Hetan Ameasa Husi Apoiante Kandidatu Taur Matan Ruak”

Deputadu Bancada FRETILIN husu ba PNTL atu halo investigasaun ba Aderito da Costa Domin ne’ebe ameasa ba komunidade iha Suku Triloka Distritu Baucau, relasiona ho eleisaun Prezidensial foin lalais ne’e.

Deputadu sira hato’o kestaun ne’e, relasiona ho keixa ne’ebe hato’o husi Xefe Suku Triloka no vitima sira seluk iha uma fukun Parlamentu Nasional.

Deputadu Bancada FRETILIN hato’o kestaun ne’e iha konferensia da imprensa iha uma fukun Parlamentu Nasional, tamba lasatisfeitu ho atetude husi eis Polisia Aderito da Costa Domin ne’ebe fo ameasa ba komunidade iha Suku Triloka, Distritu Baucau, relasiona ho eleisaun Prezidensial foin lalais ne’e.

Tuir Deputadu, Francisco Branco, husi Bancada FRETILIN ne’e husu ba Polisia Nasional Timor-Leste atu hapara aktividade terror ne’e tamba konsidera hanesan ameasas hodi la fo liberdade ba povu nia direitu atu ba vota.

“Autor ba akontesementu ne’e sistimatiku, iha dia 22, 24 no 26 ami hare hanesan akontesementu sistimatiku atu halo terror ba populasaun sira iha fatin ne’eba,” dehan Branco.

Entertantu Xefe do Suku Triloka, Maria do Karmo Desa, Tome Ximenes Desa inklui membru Comite Central FRETILIN (CCF) Joao Ximenes hateten, atetude husi Aderito da Costa ne’e tenki rejolve husi nain ulun sira.

“Hau tauk nia lori buat ruma atu tuda hau, hau lao lalais, nia hakilra tan, imi nain rua Afonso Maumea aban bai rua, karik iha ronde ke dua mak Taur la manan hau sei mai oho uluk mak imi nain rua, nia koala lia hanesan ne’e mai hau, hau dehan, Taur atu manan ka la manan mos ida ne’e desizaun Povu,” dehan Xefe do Suku ne’e.

“Nia dehan hanesan ne’e ba hau, ho ne’e FRENTE ka? hau dehan: hau atu FRENTE ka la FRENTE ka, hau liu husi Taur ka, hau liu husi Lu-Olo ka, hau labele fo sai ba ita bo'ot,” dehan komunidade.

‘Tamba iha intimidasoens ba hau nia militante sira iha distritu Baucau Vila, hau momentu ne’e hau simu telefone dehan katak, iha Sr. ida naran Aderito ba baku hau nia militante ida naran Thomas,” dehan Joao Ximenes.

Hare ba problema ne’e, Deputadu sira husu atu eleisaun la’o diak komunidade sira tenki fo kontribuisaun ba pas no dame iha eleisaun segunda Volta.

Ba kestaun ne’e, Komodante PNTL, Longinhos Monteiro, hateten, eis membru Polisia ne’ebe halo intimidasaun ba komunidade ne’e iha ona prosesu investigasaun no nia husu atu PNTL labele inklina ba Partidus Politiku maibe tenki hala’o lei no ordem.