komemorasaun Loron PNTL ba dala-12: PNTL no F-FDTL Garantia Seguransa

Image: defence.gov.au

 Notisia Husi TVTL
Tersa Kalan, 27 Fevereiru 2012

PNTL No F-FDTL Garantia Seguransa

“Lere Anan Timor: Membru F-FDTL Ne’ebe Maka Kontra Lei Nia Tenki Responsabliza”

Iha komemorasaun Loron PNTL ba dala-12, Maijor Jeneral, Lere Anan Timor, hateten, forsa Defeza sei neutru no la-sadere ba parte ida hodi fo impaktu ba estabilidade iha rai laran.

“Ami aproveita oportunidade ida ne’e atu hato’o ba publiku ou ba povu Timor oan tomak kona ba preparasaun eleisaun Prezidensial no Parlamentar, tamba sokar lia barak, isu barak, tamba ne’e mak ami hato’o mensazen ida ne’e, ami nu’udar instituisaun militar F-FDTL ninia vizaun no ninia hahalok regula tiha ona iha ita nia Konstituisaun Republika Demokratika Timor-Leste ninian, tamba ne’e mak F-FDTL sei hola nia pozisaun metin tuir Konstituisaun haruka, ba membru F-FDTL ne’ebe mak la-tuir Konstituisaun no rezimentu internu F-FDTL nian, nia sei responsabliza ba ninia hahalok ba displina militar. Se mak tama iha militar tenki tuir lei, se la-kohi halo tuir diak liu hili dalan seluk hodi tama ba politika,” deklara Lere Anan Timor.

PNTL no F-FDTL sei garantia seguransa ba Povu tomak atu bele partisipa iha festa demokrasia ne’e ho livre, sein hetan ameasa husi ema ne’ebe laiha responsablidade.