MAEOT Arcangelo Leite Deskonfia Alegasaun Abuzu de Poder No Nepotismu

Image: estatal.gov.tl

Notisia Husi TVTL
Sesta Kalan, 30 Fevereiru 2012

PN Seidauk Hasai Imunidade

“MAEOT Arcangelo Leite Deskonfia Alegasaun Abuzu de Poder No Nepotismu”

Parlamentu Nasional, seidauk hasai imunidade Ministru Administrasaun Estatal no Ordenamento Teritoriu, Arcangelo Leite, hodi ba hatan iha Tribunal Distrital Baucau, ba alegasaun abuzu de poder no nepotismu, tamba la-hetan votasaun maioria apsoluta.

Relasiona ho kazu notifikasaun husi Tribunal Distrital Baucau ba Parlamentu Nasional atu hasai imunidade hodi hala’o julgamentu ba Ministru Administrasaun Estatal no Ordenamento Teritoriu, ho statutu hanesan arguido ba alegasaun nepotismu no abuzu de poder.

Ba kestaun ne’e, Vise Prezidenti parlamentu Nasional, Maria Paixao, hateten, to’o oras ne’e dadaun Parlamentu Nasional seidauk hasai imunidade ba Ministru Administrasaun Estatal no Ordenamento de Teritoriu Arcangelo Leite, tamba deputadu seidauk fo votus maioria absoluta.

Entertantu, Ministru Administrasaun Estatal no Ordenamento Teritoriu, Arcangelo Leite, rekoinese, oras ne’e dadaun nia statutu hanesan arguido, maibe wainhira Tribunal seidauk hala’o julgamentu nia sei inosente.

Antes ne’e, Parlamentu Nasional hala’o ona plenaria dala hat(4) atu fo votus hodi hasai imunidade ba Ministru Arcangelo Leite, maibe rejultado husi votasaun hatudu la-maioria absoluta.