Ministeriu Solidaridade Sosial (MSS) Fahe Fo’os Diskrimina Povu

Image: timorhauniandoben.blogspot.com

Jornal Timor Post
Sabadu, 31 Marsu 2012
 

“Fahe Fo’os Diskrimina Povu”

Populasaun balun (Vulneravel) iha Suku Bidau Santana, Sub Distritu Cristo Rei, Distritu Dili, la-hetan fo’os ne’ebe Governu liu husi Ministeriu Solidaridade Sosial (MSS) fahe gratuita

Manuel Soares (64), informa ba Timor Post, Kuarta (28/03) iha nia hela fatin Bidau katak, nia rasik ho seluk tan la-hetan fo’os ne’ebe fahe gratuitu, maske iha area ne’ebe nia hela ba ema balun simu ona, tanba ne’e nia senti triste tebes.

Manuel mos konsidera Autoridade lokal sira mos la-koñese nia povu rasik, liu-liu, ferik-katuas sira, hodi nune’e iha suku ne’e ema barak mak la-hetan fo’os husi governu.

“Ema bo’ot sira hetan sira nia direitu dala rua-tolu, maibe tamba sa mak ami kbi’it la’ek sira la-hetan direitu hanesan, iha ami nia Aldeia kuaze ami ferik katuas nain 10 mak la hetan” hateten Manuel.

Iha sorin seluk, Joao A. da Costa hateten, nia la-kontente tebes ho intensaun ne’ebe iha hodi diskrimina sira hanesan mos povu ne’ebe kbi’it laek.

“Ami senti la kontenti ho hahalok sira ne’e, no ami husu atu parte kompetente tenki tau matan ba problema ida ne’e,” hateten Joao.

Iha fatin hanesan, Maria F. Soares azize ba parte kompetente atu halo investigasaun ba hahalok hirak ne’e, atu nune’e evita iha futuru labele halo tan diskriminasaun ba povu kbi’it la’ek sira ni direitu.

“Hau nu’udar Povu la-kontente ho hahalok KKN, tanba hahalok KKN ne’e bele hamate ema seluk nia direitu ba asesu buat ne’ebe ema hakarak,” nia hateten.