Prezidenti PN Lamenta Ho Autoridade Nasional Petroleum (ANP) InventaImage Tratamentu Especial

Image: timortoday.com

 Jornal INDEPENDENTE
Kuarta, 11 Abril 2012

“Prezidenti PN Lasama: ANP La Merese Hetan Tratamentu Espesial”

Prezidenti Parlamentu Nasional, Fernando Lasama de Araujo, hatete, la-iha instituisaun ida iha Timor-Leste ne’ebe konsidera especial liu ida hodi hetan tratamentu saude especial.

Prezidenti Parlamentu Nasional, Lasama, hateten, realidade situasaun ne’ebe povu Timor-Leste tomak infrenta seidauk oportunu hodi instituisaun ida ka, orgaun ida husu atu hetan tratamentu especial iha meus saida deit.

“ANP ne’e ema nain hira mak iha ne’eba? Ita nia situasaun maka hanesan ne’e, labele halo especial,” deklara Lasama ba INDEPENDENTE horsehik iha PN.

Prezidenti ne’e preokupa tebes katak, PN rasik ne’ebe hanesan orgaun soberanu ida, reprezetante povu de’it laiha atendementu especial ba deputadu sira bainhira infrenta situasaun saude difisil.

“PN deit laiha klinika especial, ita presija tratamentu igual ba povu tomak, lalika inventa sasan,” dehan Prezidenti PN, Lasama.

Ba kestaun ne’e, antes ne’e, Prezidenti ANP, Guldino da Silva hateten, health care ne’ebe mak ANP kria ba nia impregadu sira atu fo garantia ba saude empregadu nasional no internasional sira ne’ebe mak servisu hodi zere rikusoin prinsipal Timor nian.

Ba kestaun ne’e, hetan kritika maka’as husi sosiedade sivil sira, estudante no bankada parlamentar ho razaun katak, seidauk oportunutu atu instituisaun estadu ida husu tratamentu especial ba nia, tanba maioria povu sei infrenta situasaun difisil iha area saude nian.

Tuir informasaun ne’ebe mak diarío ne’e rekoilha katak, ANP asina ona kontratu ho Klinika Foho Osan Mean hodi hala’o tratamentu saude especial ba staff no familia tomak.