Bankada CNRT Walk Out Hodi Abandona Plenaria Iha Debate Lei Eleitoral

Image: mtci-timorleste.com

Jornal INDEPENDENTE
Kuarta, 02 Maiu 2012

Bankada CNRT Abandona Plenaria
“Bankada Parlamentar UNDERTIM No FRETILIN Ameasa Sei Lá Priense Korum”

Bankada Parlamentar UNDERTIN no FRETILIN ameasa sei lá priense korum to’o mandatu remata iha fulan Julhu, tanba bankada CNRT abandona plenaria iha debate Lei Eleitoral.

Ameasa ne’e mosu relasiona ho Lei Eleitoral Parlamentar ne’ebe loron hat resin ona ajenda maibe bankada CNRT, PSD no ASDT lá marka prezensa iha Plenaria hodi prinese korum.

Bá  kestaun ne’e, Vise Prezidenti bankada UNDERTIM, deputadu Faustino dos santos “Renan Selak” hatete, atitude CNRT hatudu atu Lei Eleitoral ne’e labele muda hodi CNRT kontinua aproveita hadau votus hanesan esperensia iha eleisaun Prezidensial foin lalais.

“Ne’e sira (CNRT) kompromi ona, atu kontinua aproveita votus hanesan eleisaun foin lalais ne’e, mais kuidadu, ami mos sei lá priense korum to’o mandatu remata,” deklara Renan ho lian maka’as.

Entertantu, Prezidenti Bankada FRETILIN iha Parlamentu Nasional, Deputadu Aniceto Guterres, hateten, aktu ne’ebe CNRT hatudu ne’e katak, Bloku AMP liu-liu CNRT, PSD no ASDT lakohi atu halo alterasaun bá Lei Eleitoral.

Nia husu ba meza PN atu kontinua ajenda lei refere tamba presija tebes partisipasaun eleitor iha eleisaun jeral.

“Nudar reprejetante povu, iha obrigasaun, dever moral atu serve interese nasional, mais se kontinua lao hanesan ne’e loron-loron, ami mos sei lá priense korum iha oin mai,” deklara Aniceto.

Nia konsidera pozisaun CNRT, hatudu hanesan politika kosmetika ne’ebe koalia oin seluk maibe hatudu hahalok oin seluk.

Ba kestaun ne’e, Prezidenti Parlamentu Nasional, Fernando Lasama de Araujo, hateten, Governu ne’ebe forma husi partidu hat (4) ne’e iha kauza nia laran.

“Hahalok ne’e hatudu Governu esta em kauza, lojika mak ne’e, Parlamentu kuandu laiha ona maioria, Parlamentu bele tau em kauza ezistensia do Governu,” lamenta Lasama.