PD Deklara CNRT Lá Etika No Iresponsabilidade

Image: allthingsd.com

Jornal INDEPENDENTE
Kuarta, 02 Maiu 2012

“PD Konsidera CNRT Lá Etika Abandona Plenaria”

Deputadu Rui Menezes husi bankada Partido Demokrata (PD) hateten, nia parte sente triste ho atetude partidu CNRT nian, tanba, partidu ne’ebe kaer governu maka abandona fali Parlamentu Nasional bainhira atu halo aprovasaun bá lei ruma.

“Iha pratika Demokrasia, lolos opozisaun maka halo walk out, maibe iha Timor oin seluk, partidu ne’ebe kaer governu mak abandona fali plenaria Parlamentu, ne’e hatudu lá etiku, hahalok lá diak bá Demokrasia,” deklara Rui ho lian maka’as iha PN, Segunda-feira, foin lalais ne’e.

Lamentasaun hanesan mos, deklara husi deputada PD, Gertudes Moniz, katak, CNRT iha tempu ikus hatudu, iresponsablidade nu’udar partidu ida ne’ebe hamutuk hari’i Governu.

“Se Povu maioria mak kontinua lá partisipa iha eleisaun ne’e, sala deputadu sira nian, liu-liu deputadu CNRT nian,” dehan nia.

Gertude dehan, sinal refere hatudu bá koligasaun iha futuru tamba hatudu deskonfiansa bá malu.

Maske nune’e, Prezidenti Parlamentu Nasional, Lasama de Araujo, deside atu lei refere kontinua ajenda iha Kuarta no Kinta-feira hodi deskute.

Entertantu, Porta Voz bankada CNRT, Aderito Hugo da Costa, defende katak, sira abandona plenaria tanba planu alterasaun lei eleitoral iha tendensia politika.