FFTL Ladauk Selu Hotel Balun Iha Indonesia Hamutuk 60,000 Mill Dolares

Jornal INDEPENDENTE
Segunda, 07 Maiu 2012

“FFTL Seidauk Selu Hotel Balun Iha Indonesia”

Sekretariu Estadu Joventude Desportu (SEDJ), Miguel Manitelo, deklara nia foin simu karta ida husi organizasaun Sea Games, husi Indonezia, katak, Federasaun Footebol Timor-Leste (FFTL) seidauk selu hotel balun iha Indonezia.

Dividas hamutuk osan 60,000 mill dolares Amerikanu, maibe SEDJ lá temi hotel nia naran, ne’ebe delegasaun desportiva Timor-Leste uza hodi partisipa iha eventu Sea Games, iha tinan kotuk.

Governu ne’ebe lidera husi Primeiru Ministru Xanana Gusmao fo apoiu ba FFTL bá iventu Sea Games hamutuk total 1,6 milliaun Dolar Amerikanu.

“Osan ne’e 1,6 millioens hahu husi preparasaun to’o remata, tanba bá rai seluk ne’e osan ki’ik, maibe bá TL osan ne’e boot,” tenik nia.

Entertantu, SEJD rasik pronto atu fo informasaun no kontribuisaun bá Komisaun Anti Korupsaun (CAC) hodi investiga klean lideransa FFTL.

Tanba deskonfia hamosu indikasaun Korupsaun, Kolusaun, Nepotismu (KKN) bá falsifikasaun resivu iventu sea Games foin lalais ne’e.

Nia dehan, KKN iha FFTL ne’e mosu dezde uluk kedas, no nia parte konsege husu bá Inspector Jeral Estado maibe to’o agora laiha rejultadu.

Nia reforsa liu tan katak, FFTL hatama ona bá nia parte, maibe nia haree iha buat balun ke ladun lo’os iha gastu orsamentu.

SEDJ duvida bá relatoriu ne’e, tanba resivu balun “scan” deit.

“Investiga mos organizasaun desportiva sira, tanba dala ruma sira dehan ami mak halimar fali,” dehan nia.

Ba kestaun ne’e, Sekretariu Jeral FFTL, Amandio Araujo Sarmento, hateten, sira nia parte haruka ona resposta eskrita ba CAC iha loron Sesta liu bá.