KFP Hahu Loke Procesu Investigasaun Ba Funsionariu Publiku 40

Image: noticias.terra.es

Jornal INDEPENDENTE
Kuarta, 02 Maiu 2012

“KFP Hahu Investiga Funsionariu Publiku 40”

Komisaun Funsaun Publiku (KFP) hahu loke prosesu investigasaun ba Funsionariu Publiku nain 40 ne’ebe identifika involve iha kampaña eleitoral primeira no segunda ronda.

Prezidenti KFP, Komisariu Liboriu Pereira, hateten, prosesu ne’ebe oras ne’e dadauk la’o, sei konfirma ho funsionariu sira ne’ebe naran tama iha lista funsaun publiku nian.

Ne’e duni, nia hatutan, prosesu verifikasaun maka bele identifika iregularidade ne’ebe maka funsionarius sira komete durante tempu kampaña politika.

“Sedu ka tarde, bainhira prosesu ne’e hahu tenke foti konkluzaun pozitivu hodi labele kondena ema sein (lá ho’o) faktu,” esplika Liboriu.

Maibe, to’o ohin loron sekretariadu KFP sediauk defini klaru kona bá iregularidade ne’ebe mak funsionariu sira komete.

Antes ne’e, tuir ekipa monitorizasaun PDHJ hasai relativu katak, funsionariu publiku hamutuk nain 6 mak envolve iha kampaña eleisaun Prezidensial, primeira volta husi kandidatu Jose Luis Guterres no mos hamutuk ho kareta, motor Estadu, hamutuk 10 resin mak envolve iha kandidatura prezidenti Fernando Lasama nian, inklui Francisco Guterres “Lú-Olo”, Taur Matan Ruak, no seluk tan.