Koligasaun Laiha Konsensus AMP Hahu Nakdoko

Jornal Timor Post
Sabadu, 05 Maiu 2012

“L7: AMP Hahu Nakdoko”

Prezidenti Partidu Unidade Nasional Demokratika Rezistensia Timorense (UNDERTIM), Cornelio Gama ‘L7’, hateten, koligasaun Aliansa Maioria Parlamentar (AMP) ne’ebe hala’o iha tinan 2007 hahu nakdoko ona iha tinan ikus.

“Fou-foun AMP forte maibe agora nakdoko ona, ne’ebe, ami deside tetu didiak mak halo koligasaun tan, se lá diak, ami bá opozisaun,” L-7 dehan bá Jornalista sira iha sede partidu UNDERTIM, Fatuhada Dili, Sesta (05/05).

Nia dehan, koligasaun ne’ebe atu halo iha eleisaun Parlamentar tinan 2012, ne’e sei halo depois de eleisaun para bele hare’e se’e mak bo’ot, nune’e bele forma Aliansa ida ne’ebe ke forte.

Maske nune’e, Prezidenti UNDERTIM hakalaken, partidu UNDERTIM seidauk iha hanoin atu halo koligasaun ho partidu sira seluk antes eleisaun Parlamentar, tamba partidu 26 mak sei kompete iha eleisaun Parlamentar 7 Julhu mai ne’e.

Nia mos haktuir katak, UNDERTIM hahu hatene ona hodi bele hili partidu ida ne’ebe mak atu halo koligasaun depois eleisaun Parlamentar atu bele serve diak liu tan bá povu no nasaun, bá dezenvolvimentu sustentavel.

Tuir nia katak, AMP ne’ebe ukun tinan 5 nia laran, progresu dezenvolvimentu lao, maibe laiha konsensus iha partidu 5 ne’ebe hamutuk durante tinan lima (5) nia laran.