Projeitu Plantasaun Vivero Husi MAP Sai Fatin Ba Animal

Image: idd.landolakes.com

Notisia Husi TVTL
Tersa Kalan, 23 Abril 2012

Governu Gasta Osan Povu Nian Saugate
“Projeitu Plantasaun Vivero Abandona Husi MAP no Sai Fali Fatin Ba Animal”

Projeitu plantasaun viveros husi Ministeriu Akrikultura no Peska (MAP), iha sub distritu Lolotoe, Distritu Bobonaro, lá utiliza ho diak, enkuantu oras ne’e dadaun sai fali fatin ba animal.

Plantasaun ne’e gasta orsamentu US$ 120.000 (Rihun Atus Ida, Rua Nolu, Dollar Amerikanu) husi orsamentu estadu tinan 2009.

Plantasaun viveros ne’e hala’o iha tinan 2009, maibe to’o oras ne’e lá utiliza. Populasaun suku Oupa, Sub Distritu Loloto’e, Distritu Bobonaro, maka oferese rai ne’e ba governu, tamba ne’e populasaun sira husu ba Governu bele responsabliza ho diak.

Jose Afonso nu’udar responsavel seguransa ba plantasaun viveros ne’e intorma katak, durante ne’e Ministeriu Agrikultura laiha ona kontrola no mos viveros ne’e kleur ona abandona.

Aliende ne’e, xefe Aldeia Mape, Suku Opa informa katak, Governu bele utiliza ba atividade seluk, tamba plantasaun ne’e gasta orsamentu povu nian.

“Husi Ministeriu kompotente nunka toma atensaun, fakar osan povu nian saugate deit, tamba ne’e mak ami komunidade Mape mos triste,” dehan Xefe Aldeia ne’e.

Observasaun TVTL hatudu katak, aliende plantasaun ne’e, iha mos fatin hakiak ikan iha Mape lá utiliza, tamba ne’e populasaun sira husu ba Prezidenti eleitu bele xama atensaun ba Governu hodi bele tau matan ba plantasaun no mos sasan estado nian iha Suku Opa, Sub Distritu Lolotoe, Distritu Bobonaro ne’ebe abandona.