Arsenio Bano: Estrada Kuak Iha Teritoriu TL Tomak

Image: Timorhauniadoben.blogspot.com

Jornal Timor Post  
Sabadu, 10 Marsu 2012

Arsenio Bano: Estrada Kuak Iha Teritoriu TL Tomak

 
Partidu FRETILIN Preokupa tebes ho estrada ne’ebe a’at iha teritoriu Timor-Leste, ne’ebe maka to’o agora laiha atensaun husi Governu atual.

Relasiona ho kondisaun Estrada iha teritoriu Timor-Leste tomak ne’ebe kuak barak husi rai ikun to’o rai ulun, husi tasi feto to’o tasi mane, maibe governu nunka iha atensaun, maski kada tinan Governu Aliansa maioria Parlamentar (AMP) ne’ebe maka chefia husi Primeiru Ministru Kay Rala xanana Gusmao aloka orsamentu barak ba infraestrutura.

“Povu sira tenki loke matan para hare kondisaun estrada agora, konta ho tinan hirak liu agora a’at ba beibeik, orsamentu aloka barak ba estrada maibe estrada kuak nafatin, laiha kualidade, maibe, kualidade ita hare membru governu sira mak hetan kualidade husi orsamentu hamutuk ho governu,” Hateten Vise Prezidenti Partidu FRETILIN, Arsenio Paixao Bano (09/03) iha kampanha kandidatu Prezidenti Republika Lu-Olo nian iha Distritu Ainaro.

Partidu FRETILIN ne’ebe maka uluk defende rai Timor, to’o lori nasaun Timor-leste hetan libertasaun husi okupasaun, preokupa tebes ho kondisaun.

“Partidu FRETILIN preokupa tebes ho estrada kkuaze teritoriu tomak, uluk ba distritu Same ka Suai kuaze lori deit oras 4 maibe, agora lori oras 7 resin, tanba ne’e, ami husu ba povu tomak atu loke matan hodi hare, tanba Partidu FRETILIN maka hatene tuir povu nia moris,” kestiaona Deputadu FRETILIN Arsenio Bano.