Governu AMP Laiha Atensaun Estrada Kontinua Kuak

Jornal Timor Post
Sabadu, 10 Marsu 2012   

Inacio Moreira: Governu AMP Fakar Osan Miloens Ba Miloens Maibe Estrada Kontinua Kuak

 
Deputadu husi Bloku Opozisaun FRETILIN Inacio Moreira ne’ebe maka iha komisaun Infraestrutura Parlamentu Nasional, kestiona konaba orsamentu ne’ebe maka kada tinan ho miloens ba miloens maibe estrada kontinua kuak ba bei-beik.

“Governu AMP fakar osan miloens ba miloens maibe estrada kontinua a’at ba bei-beik, laiha atensaun, estrada kuak agora ita halai la sala, tanba ne’e ema ne’ebe uluk garante povu nia moris maka uniku, Partidu FRETILIN mesak, tanba iha responsablidade ba povu lori nasaun ukun rasik a’an, no iha mos responsablidade atu hadia povu nia moris no dezenvolve nasaun,” dehan Inacio.

Iha fatin hanesan, Povu Aileu Domingus de Araujo ho sentimentu hanesan ho lider FRETILIN, tanba povu ida ne’ebe maka iha baze senti triste kuandu hare estrada kuak.

“Ami povu kiik hare estrada kuak, ita hanoin barak fali, ita nia riku soin barak kada tinan ami povu rona aloka osan juta ba juta, maibe, orsamentu ne’e naran de’it maka sai, ami povu lahatene osan ne’e ba hotu iha ne’ebe,” Domingos dehan.

Durante kampania KAPREZ Francisco Guterres Lu-Olo iha Distritu tomak, husi Distritu Ermera, Manufahi, Baucau, Viqueque, Lautem, Ainaro, Covalima no Aileu kuaze estrada hirak ne’e grave tebes.

Tuir observasaun Jornalista iha distritu hirak ne’e nota katak, kondisaun estrada grave dunik. Maske estrada kuak iha kuaze teritoriu tomak, maibe laiha atensaun husi governu.

Problema ne’ebe afeita iha distritu 13, laos estrada de’it, maibe bé mo’os, eletrisidade, saude, no edukasaun. Saude sustentavelidade, importante governu haforsa edukasaun, saude, agrikultura, no kondisaun estrada sai diak, atu nune’e bele mobiliza dezenvolvimentu lao ho ekilibradu.

Duvidas bo’ot liu mai husi Partidu FRETILIN durante ne’e, kestiona mos konaba estrada iha kapital Dili, kada tinan Governu sempre aloka osan husi pakote emerjensia hodi taka estrada kuak, maibe estrada hirak ne’e nia kondisaun laiha kualidade, kuak ba beibeik.