Deputadu husi FRETILIN, Francisco Miranda Branco, Husu Governu Intervein Folin Mina

Image: fretilinmedia.blogspot.com

Jornal Timor Post
Tersa, 03 Abril 2012

“PN Husu Governu Intervein Folin Mina”


Reprejetante povu iha uma fukun Parlamentu Nasional (PN) husu ba Governu atu kria politika diak ida hodi intervein folin mina ne’ebe sa’e dadauk iha rai laran, tanba mudansa folin mina iha nasaun vizimu Indonesia.

Timor-Leste, hanesan nasaun ne’ebe importa mina husi Indonesia no Singapura, tamba ne’e, wainhira folin sa’e iha nasaun rua ne’e afeta kedas ba Timor-Leste.

Ba kestaun ne’e, Deputadu husi Bankada FRETILIN, Francisco Miranda Branco, iha Plenaria PN, segunda (02/04) hateten, wainhira Governu la-halo intervensaun maka konsekuense sai da’et ba folin sasan merkadoria Timor-Leste.

“Ita hotu hatene katak, iha merkadu mundial folin mina hetan aumenta, ne’ebe nia implikasaun afeta ba ita hotu, maibe atu responde ba situasaun ida ne’e, so Governu maka bele responde ho nia politika hodi halo nusa maka bele halo intervensaun hodi labele afeta ba transporte publiku, no afeta mos ba folin sasan iha merkadu,” hateten Branco.

Iha parte seluk, Branco mos haktuir tan, folin mina ne’ebe sa’e sei fo impaktu ba estudante sira, tan realidade hatudu dadauk ona iha sidade Dili, mikrolet sira komesa hapara sira nia operasaun.

Entertantu, tuir observasaun Timor Post, durante semana hikus ne’e, folin mina iha rai laran komesa sa’e, no afeta dadauk ona ba transporte publiku sira, mikrolet no taxi sira komesa hasa’e ona folin ba pasajeirus.