Membru F-FDTL Baku Francisco Amaral To’o Dezmai

Image: klaak-semanal.blogspot.com

 Jornal Timor Post
Tersa, 03 Abril 2012

“Lamenta Membru PN, Membru F-FDTL Baku Povu”

Reprejetante povu iha uma fukun Parlamentu Nasional (PN) lamenta tebes ho membru Falintil-Forsa Defesa Timor-Leste (F-FDTL) ne’ebe baku povu ida, ho naran Francisco Amaral, Segunda (02/04) kalan, iha Suku Debos, Sub-Distritu Suai, Distritu Covalima.

Maske seidauk hatene lolos motivu akontesementu ne’e, maibe reprejetante povu sira konsidera hahalok membru F-FDTL ne’e hanesan tratamentu dezumanu, tanba tuir informasaun ne’ebe deputadu sira hetan husi Suai katak, Francisco hetan baku to’o dezmaia no tenki evakua ba halo tratamentu iha Ospital Covalima.

Deputadu Husi bankada FRETILIN, Francisco Miranda Branco, iha Plenaria PN, hateten, F-FDTL la devia halo agresaun fiziku hasoru populasaun sira, tanba iha terenu wainhira populasaun sira halo sala iha polisia atu halo atendementu.

“Ita ohin loron moris iha Timor-Leste nu’udar Estadu de Dereitu Demokratiku, ne’ebe Instituisaun Seguransa i Defeza, ida-idak hatene nia knar tuir mandatu ne’ebe mak iha, tuir Konstituisaun haruka, laos halo fali hanesan akontesementu ne’e,” dehan nia.

Branco akresenta tan katak, hanesan reprezetante povu, hakarak defende povu, hakarak defende dereitu povu nian, ba moris hakmatek, tanba tuir nia Povu Timor Leste terus resik ona no agora hakarak moris hakmatek, no presiza respeita povu nia moris livre.

Wainhira rona informasaun ne’e, Prezidenti Parlamentu Nasional, Fernando La sama de Araujo, antes ne’e mos rona ona husi populasaun sira iha Suai, tanba ne’e, Lasama konsidera hahalok membru F-FDTL ne’e grave no presiza tebes atensaun husi komando.

“Hau kontaktu ona ba Brigadeiro Filomeno Paixao, Komodante Anfonso de Jesus, Komodante Jeral PNTL, Longuinhos Monteiro, atu halo investigasaun para lori vitima ne’e ba ospital tanba la sadar tiha ona, i lori mos membru F-FDTL ne’e ba halo investigasaun,” hateten La sama.