Eis Kandidatu PR Angelita Pires Apoia Lú-Olo Iha Segunda Ronda

Image: theaustralian.com.au

Notisia Husi TVTL
Segunda Kalan, 26 Marsu 2012

Eis Kandidatu PR Angelita Pires Apoia Lú-Olo Iha Segunda Ronda

“Reis Kadalak: Se Taur Matan Ruak Mai Husi FRETILIN Mak Sai Jeneral Diak Liu Fo Ba FRETILIN”

Eis Kandidat Prezidenti da Republika Angelita Pires deside fo apoiu tomak ba Francisco Guterres Lú-Olo iha eleisaun Prezidensial, iha segunda Volta, rajaun fundamental fo apoiu ba kandidatu Prezidenti Francisco Guterres Lú-Olo tamba la-aseita ho lei imunidade no lei pensaun vitalisa.

Deklarasaun ne’e hato’o husi ekipa susesu kampaña Prezidensial, Angelita Maria Francisca Pires, liu husi konferensia da imprensa iha sede Bebonuk, Suku Komoro, Dili, Marcos Soares no Reis Kadalak husu ba apoiantes iha distritu 13 atu fo votus ba Francisco Guterres Lú-Olo, tamba kandidatu ne’e Luta ba Lia Los no hakarak implementa lolos Justica iha rai ne’e atu povu labele sai vitima.

“Eis kandidatu Prezidenti, Sra. Angelita Maria Pires, hamutuk ho ekipa susesu nasional tetu, ho rajaun, ida, luta ba justica no lia los ou kontra injustica, rua, luta no kontra korupsaun no nepotizmu, tolu, ami lakohi nasaun Timor-Leste atu aplika nafatin lei imunidade, hat, ami lakohi dezempregu ou krizi social moris terus no kiak,” deklara Porta Vos Ekipa Susesu.

“Prontu Taur Matan Ruak, nia mos mai husi rejistensia ida, maibe ita kuandu hare’e didiak, nia mos mai husi FRETILIN, entaun Taur Matan Ruak se mai husi FRETILIN maka nia sai Jeneral depois no fim nia rejigna an, tama iha kandidatura e nia konsege duni iha segunda volta, diak liu fo'o ba FRETILIN,” dehan Reis Kadalak.

Aliende ne’e, rajaun fundamental atu fo’o votus ba Francisco Guterres Lú-Olo tamba la-aseita ho lei imunidade no mos lei pensaun Vitalisa ne’ebe fo vantazen de’it ba ema bo’ot no ema riku sira.