Dili, Timor-Leste 23/3/2012 10:18 (LUSA)
Dili, 23 Marsu (Lusa) – Liu husi komunikadu imprensa, Prokuradora Jerál Repúblika (PJR) husu ba media tomak atu hato’o informasaun lo-lo'os iha segunda ronda eleisaun prezidensiál atu ajuda eleitór sira vota ho liberdade tomak.
Tuir komunikadu ida ne’e, “ PJR husu ba media tomak atu hala’o didiak sira nia kna'ar atu ajuda hari'i ambiente ida ne’ebé halo eleitór sira partisipa no vota ho liberdade tomak iha segunda volta eleisaun prezidensiál nian, ambiente ida ne’ebé sei la-fó fatin ba manipulasaun ka kondisaun ne’ebé bele sátan eleitór sira no halo sira la vota tuir sira nia hakarak rasik”.
Iha dokumentu ida ne’e, PJR hatete mós katak “nia hein media sei hato’o informasaun tuir faktus no nune’e respeita povu, Konstituisaun no lei sira seluk”.
PJR fó-sai komunikadu ida ne’e hafoin jornal timorense ida tatoli katak “Atuál Prezidente Ramos Horta sei la vota ba Lú-Olo iha segunda ronda prezidensiál."
Hafoin jornal fó-sai notísia ida ne’e, gabinete Prezidénsia Repúblika nian hatán kedas katak notísia ne’e la-lo'os.
Iha mós komunikadu ida nee’e, PJR bolu atensaun katak notísia hanesan ne’e hatudu komportamentu ida ne’ebé bele mós tama iha kategoria krime eleitorál. “Artigu 234 Kódigu Penal nian prevé katak ema ne’ebé halo buat ruma atu sátan votasaun ka halo eleitor la-vota tuir nia hakarak rasik, bele hetan kastigu tinan tolu(3) iha kadeia ka multa”.
Kandidatu rua mak sei taru malu iha segunda ronda eleisaun prezidensiál ne’ebé sei halo iha 16 Abril 2012. Ida mak Francisco Guterres "Lú-Olo", kandidatu ida ne’ebé simu apoiu hosi Frente Revolucionária do Timor-Leste Independente (FRETILIN) no ida seluk mak Taur Matan Ruak, kandidatu ida ne’ebé simu apoiu hosi Conselho Nacional de Reconstrução Timorense (CNRT), partidu ne’ebé kaer ukun, lidera husi Primeiru-Ministru Xanana Gusmão).
Prezidente Ramos Horta hetan terseiru lugar iha primeira ronda eleisaun prezidensial ne’ebé halo iha 17 Marsu 2012.
MSE
Lusa/Fim
No comments:
Post a Comment