Segunda Ronda "Abilio Araujo Fo’o Sinal Apoiu Lú-Olo”

Image: abilioaraujopr.com

Jornal INDEPENDENTE
Tersa, 27 Marsu 2012

Prosesu Kandidatu PR Ba Segunda Ronda

“Abilio Araujo Fo’o Sinal Apoiu Lú-Olo”

Prezidente Partidu Nacional Timor (PNT) no Kandidatu Prezidenti Republika iha Primeira Ronda, Abilio Araujo, fo ona sinal hodi fo apoiu ba kandidatu Prezidenti Republika Dr. Francisco Guterres Lú-Olo iha eleisaun segunda ronda iha 16 Abril tinan ne’e.

Kandidatu PR seluk ne’ebe mos lakon iha eleisaun foin dadaun, ne’ebe fo’o ona apoiu ba Lú-Olo mak Maria do Ceu, Manuel Tilman, no Angelita Pires.

Nune’e mos Bloku proklamador ne’ebe fo’o apoiu, Rogerio Lobato, no Partidu KHUNTO ne’ebe fo’o apoiu ba Horta iha Primeira Ronda, deklara mos fo sira nia apoiu ba Lú-Olo.

Informasaun seluk mos mai husi CCF katak, Rogerio Lobato mos fo’o sinal ona hodi fo’o apoiu ba Lú-Olo iha Segunda Ronda.

Ba kestaun hirak ne’e, Abilio haktuir katak, maske nia seidauk halo deklarasaun ofisial ida kona ba nia pozisaun, maibe nia kontaktu ona ekipa susesu Lú-Olo nian hodi deskute kestaun ne’e,” hau koalia tiha ona ho nia Prezidenti Kamarada Mari Alkatiri, ami rua koalia tiha ona, mais ne’e liu husi telefone, buat sira ne’e tenki koalia no tempo sei iha,” dehan nia.

Tuir Abilio, kandidatu nain rua, Lú-olo no Taur Matan Ruak ne’ebe mak sei konkore iha segunda ronda, sira nain rua ne’e lider potensial, esperensia no istoria hanesan, maibe nia sei fo apoiu ba Kandidatu Prezidenti Lú-Olo.

Abilio mos dehan tan, ba nia importante mak Prezidenti tenki garante estabilidade nasional, hanesan Xefe do estado no komandante supremu forsa armadas.

Abilio dehan, Timor-Leste presiza Prezidenti Republika ida ne’ebe bele orienta governu hodi halo manajementu diak iha Governasaun nia laran.