F-FDTL Iha Konfiansa Maka’as Ba FRETILIN

Jornal INDEPENDENTE
Tersa, 27 Marsu 2012

F-FDTL Iha Konfiansa Maka’as Ba FRETILIN
“Lere Husu FRETILIN Hametin Nafatin Dame Iha TL”

Falintil-Forsa Defeza Timor-Leste (F-FDTL) iha konfiansa maka’as ba FRETILIN, tanba ne’e husu ba partido istoriku ne’e labele halo violensia iha eleisaun segunda ronda iha loron 16 Abril oin mai.

Povu Timor-Leste foin sai husi kolonializasaun barak, hahu husi tempo portugues, Indonesia no iha tempo ukun aan, tanba ne’e, povu hakarak tu’ur hakmatek iha pas no estabilidade nia laran, tanba ne’e, FRETILIN tenki hametin nafatin dame iha Timor-Leste.

Komandante Jeral F-FDTL, Major Jeneral Lere Anan Timur afirma deklarasaun ne’e iha enkontru ho lider FRETILIN, iha Comite Central FRETILIN (CCF), Komoro, Dili, Segunda loron (26/03).

Iha enkontru ne’e, Maijor Jeneral Lere hakarak hatene pozisaun husi Partidu FRETILIN iha eleisaun Prezidensial segunda ronda no situasaun atual rai laran.

Hafoin enkontru, Sekretariu Jeral FRETILIN, Mari Alkatiri Reafirma katak, instituisaun F-FDTL kontinua firme no neutru hodi garante situasaun pas no estabilidade iha eleisaun segunda ronda, ne’ebe hanesan mos FRETILIN nia hakarak durante ne’e.

F-FDTL mos apela ba kandidatu nain rua, inklui militante no simpatizante sira atu simu rejultadu seleisaun segunda ronda nian.

“FRETILIN kontinua iha postura kontra Violensia,” dehan Alkatiri.

Lideransa FRETILIN ne’ebe sempre halo istoria ne’e hateten, FRETILIN kontinua mantein pozisaun atu defende no kria pas no estabilidade nasional, liliu ajuda autoridade seguransa ne’ebe kompotente hodi hametin pas no estabilidade nasional.