FALINTIL Mai Husi FRETILIN “Lere: Laiha Golpe”

 Jornal Timor Post
Kuarta, 28 Marsu 2012

 

FALINTIL Mai Husi FRETILIN

“Lere: Laiha Golpe”

Maijor Jeneral F-FDTL, Lere Anan Timor hateten, einkuantu sira ne’ebe mai husi ailaran sei moris, golpe Estadu sei laiha.

“Ba sira ne’ebe trauma Forsas Armadas atu halo Golpe ne’e, labele hanoin barak, laran metin ba instituisaun PNTL no F-FDTL, einkuantu ami ne’ebe mai husi ailaran kuandu komanda, golpe seidauk iha, keta aban bain rua segunda no terseira jerasaun mak halo ida ne’e maibe ami hakarak forsa diak para rai Timor ne’e to’o naben,” Lere dehan.

Maijor Jeneral F-FDTL hato’o kestaun ne’e iha konferensia ba imprensa ne’ebe hala’o iha Kuartel Jeral PNTL, Caikoli, Dili, Tersa (17/03), relasiona ho boatus ne’ebe ema lansa katak, kuandu kandidatu balun lakon iha eleisaun segunda ronda, sei akontese golpe.

Nia lakohi atu iha violensia nafatin, nia hakarak iha paz no estabilidade para hodi halo dezenvolvimentu ba nasaun hodi hadiak povu nia moris.

Lere mos sujere ba elemntus sira ne’ebe mak halo ameasa ba povu lori instituisaun seguransa no defeza nia naran, tenki husik fila farda para fila ba vida sivil hodi halo politika de’it.

Kona-ba ninia Prezensa iha Comite Central FRETILIN (CCF), Segunda (26/03), Lere hatan, intensaun ba CCF la’os atu politika, maibe la-bele hamos tiha fali istoria ne’ebe mak Partidu FRETILIN halo ba nasaun ne’e.

“Ida ne’e istoria, ita labele hamo’os iha ita nia istoria, hotu-hotu hatene katak, FALINTIL mai husi FRETILIN, maibe agora sai nudar instituisaun Defeza Nasaun no Povu nian para iha neutralidade,” Lere esplika.

Komodante ne’e mos rekoiñese katak, nia hakat ba Comite Central FRETILIN (CCF) tanba rona keixa barak kona-ba F-FDTL, aliende ne’e hasoru kandidatu Lú-Olo iha sede FRETILIN