Problema Interna Partidu UNDERTIM “Reis Kadalak: L-7 La’os Fundador UNDERTIM"

Image: de.wikipedia.org

Notisia Husi TVTL
Tersa Kalan, 27 Fevereiru 2012

Problema Interna Partidu UNDERTIM

“Reis Kadalak: L-7 La’os Fundador UNDERTIM no Desizaun Ne’ebe Nia Foti Injusta”

Sekretariu Jeral Partidu UNDERTIM rejeita total deklarasaun ne’ebe fo sai husi L-7, ne’ebe hateten, nia involve iha aktu korupsaun, iha Parte seluk, Reis Kadalak hateten, Prezidenti partidu UNDERTIM laiha direitu atu espulsa nia husi UNDERTIM.

Sekretariu Jeral UNDERTIM Francisco Guterres alias Manubui fo reasaun maka’as ba akuzasaun Prezidenti UNDERTIM ne’ebe hateten nia involve iha korupsaun ba osamentu partidu nian ho montante US$92.000 (Rihun sia nolu resin rua dollar Amerikanu). Tuir Manubui akuzasaun ne’e falsu no bosok tamba antes ne’e CNE rasik halo ona auditoria ba relatoriu ne’ebe sira hato’o.

“Se kazu mak alega nafatin orsamentu ne’ebe uja ba Partidu nian, husu de’it ba CNE, tamba CNE relatoriu mak ami intrega ona, se hau mak halo korupsaun CNE bele lori Polisia mai kaer hau, hau pronto ba hasoru Tribunal Rekursu, se alegasaun ida ne’e falsu maka, aban bain rua hau sei hateten ba publiku tomak katak, hau mos nudar hanesan ema tenki kembalikan hau nia nama baik, hau sei hato’o wainhira kuandu laiha evidensia hatudu katak hau sala,” dehan Sekretariu Jeral UNDERTIM.

Iha parte seluk, Reis Kadalak nu’udar fundador partidu UNDERTIM hateten, L-7 laiha direitu atu espulsa liu husi Partidu UNDERTIM, tamba L-7 tama iha UNDERTIM tamba sira mak husu, Reis Kadalak mos husu ba L-7 atu hanoin didiak hodi foti desizaun, tamba nia (L-7) la’os fundador partidu UNDERTIM.

“Tamba instituisaun ne’ebe Kornelo Gama L-7 halo ba kompaineiro sira “Manubui” ne’e, desizaun ida ne’e illegal, tamba ne’e la’os kompetensia ninian, maibe ne’e kompetensia Komisaun Juridiksaun Nasional nian, nia (L-7) laiha idretu, nia laiha rajaun, nia laiha kompetensia atu hasai ema nain 3 ne’e ka militante ou membru selu-seluk, nia desizaun ne’e injusta,” dehan Reis Kadalak.

Oras ne’e dadaun membru UNDERTIM balun fo nia apoiu ba kandidatu Prezidenti da Republika Taur matan Ruak no balun fo apoiu ba kandidatu Prezidenti Dr. Francisco Guterres “Lú-Olo”.